Charter Document - 07010599

Gregorius [] archiepiscopo et penitentiario Eboracensi et fratri S monacho Rivallensi Cisterciensis ordinis Ad audientiam nostram noveritis pervenisse quod nonnulli ecclesiarum et capellarum parochialium civitatis et dioecesis Eboracensium rectores querentes commissarum sibi ovium solummodo lac et lanam ac earum salutem penitus postponentes nec per se nec per alios idoneos vicarios debitum in eisdem exhibere procurant Domino famulatum propter quod sepe contingit quod grex Dominicus nullo duce in peccatorum foveis se periculose precipitat et negligentia pastoris evacuat omnem fere reverentiam earundem Nolentes igitur per aliquorum incuriam easdem debitis obsequiis ulterius defraudari et aliorum facere culpas nostras discretioni vestre in virtute obedientie per Apostolica scripta districte precipiendo mandamus quatenus dictis rectoribus omnibus quotquot sunt sive intra vel extra regnum Anglie ubicumque consistant monitione premissa quam receptis his literis absque more dispendio faciatis auctoritate nostra mandetis ut singuli eorum qui nulla se Apostolice sedis dispensatione tuentur a tribus mensibus post commonitionem vestram in prefatis ecclesiis et capellis sibi commissis residentiam faciant personalem Hi vero qui ab Apostolica sede ne personaliter residere cogantur specialem noscuntur indulgentiam obtinere infra terminum ipsum vel idoneos perpetuos vicarios instituendos in ipsis ab eis ad quos institutio de jure spectare dinoscitur qui merito vite ac talento scientie subjectum populum verbo ac exemplo velint et valeant erudire assignando eis in predictis ecclesiis et capellis juxta facultates ipsarum pro necessitatibus eorundem et episcopalibus archidiaconibus [] aliisque oneribus a prefatis vicariis supportandis redditus competentes studeant presentare vel in talibus ecclesiis et capellis ab eodem termino postquam a vobis commoniti fuerint personaliter residere procurent Alii autem quibus ab Apostolica sede specialiter monstratur indultum de pluribus beneficiis obtinendis curam habentibus animarum nisi tempore dispensationis adepte obtinuissent prebendam in ecclesia cathedrali in qua residere tenentur in una ecclesiarum suarum in qua magis videbitur expedire a predicto termino postquam ipsos duxeritis commonendos residere personaliter non postponant ad alias sibi commissas ecclesias vel capellas juxta prescriptam formam perpetuos vicarios idoneos presentantes alioquin vos ex tunc auctoritate nostra suffulti habentes per oculis solum Deum hujusmodi vicarios eligatis et ab eis ad quos institutio de jure dinoscitur pertinere in prefatis ecclesiis et capellis institutis eisdem prescriptos ipsis in eis redditus assignetis Si vero hi ad quos institutio hujusmodi pertinet infra tempus a vobis provide moderandum neglexerint instituere predictos vicarios ab eisdem sibi rectoribus presentatos vos auctoritate Apostolica nihilominus instituatis eosdem ita quod per hoc nullum eis in posterum prejudicium generetur Ceterum si quis inventus fuerit plura beneficia obtinere habentia curam animarum annexam nisi vobis ostendat secum super hoc esse a sede Apostolica dispensatum per indulgentiam specialem ipsum ultimo beneficio mandetis esse contentum cum primo secundum Generalis statuta Concilii sit ipso jure privatus et si forte illud retinere contenderit eum etiam alio spolietis Contradictores si qui fuerint vel rebelles per subtractionem beneficiorum suorum et si necesse fuerit per censuram ecclesiasticam sublato cujuslibet appellationis contradictionis et excusationis obstaculo compescendo preceptum nostrum taliter impleturi quod super hoc non possitis aliquatenus de negligentia reprehendi et Dominus ultionum de vestris manibus non requirat in tremendo judicio sanguinem predictorum Quod si non omnes [] tu frater archiepiscope [] Datum Reate iiij idus Septembris pontificatus nostri anno quinto