Charter Document - 07010590
| Charter Number: | 07010590 |
|---|---|
| Cartulary Title: | The Register, or Rolls, of Walter Gray, Lord Archbishop of York |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1226 |
| Date type: | Internal, Calendar, Papal |
| Resource Link(s): |
|
Charter:
Honorius episcopus servus servorum Dei dilectis fratris archiepiscopo Eboracensi Significantibus priore et conventu Dunelmensis ecclesie nobis innotuit quod ecclesia ipsa nuper pastore vacante ipsi de substitutione futuri episcopi tractaturi prout moris est convenientes in unum invocata Spiritus Sancti gratia magistrum W Wigorniensem archidiaconum quem de providentia honestate litteratura et morum compositione commendant canonice ac concorditer in suum episcopum elegerant Sed cum tibi tanquam loci metropolitano electionem quam de ipso fecerant presentassent tu ad examinationem ipsius procedere hactenus distulisti Unde humiliter petierunt ut dignaremur misericorditer providere ne dicta ecclesia diu maneat pastoris solatio destituta Cum autem mora in talibus plurimum ecclesiis sit damnosa fraternitati tue per Apostolica scripta mandamus quatenus infra duorum mensium spatium post receptionem presentium in ipsius electionis negotio juxta officii tui debitum previa ratione procedas Quod si forte infra predictum tempus non duxeris procedendum electionis formam et processum ipsius ad nos sine dispendio more remittas ut super hoc quod secundum Deum statuendum viderimus statuamus Datum Laterani xj kalendas Januarii anno decimo primo