Charter Document - 07010589

Honorius episcopus servus servorum Dei dilectis fratris archiepiscopo Eboracensi Cum Eboracensem ecclesiam sincero diligentes affectu dilectis filiis decano et capitulo ipsius ecclesie universis et singulis liberaliter exhibeamus gratiam et favorem decet eos ut prona devotione nobis placere studentes dilectum filium magistrum Laurentium de Sancto Nicholao subdiaconum et capellanum nostrum canonicum Eboracensem obtentu nostri speciali benevolentia prosequantur et in reddendis eidem rationibus suis non solum difficultatem aliquam minime innectant subtilitatibus captiosis verum etiam caritatis studio exhibeant gratiam liberalem cum et ipse potens sit gratiam compensare pro gratia et nos si quid deesset supplere facile valeamus Sane idem coram nobis exposuit quod prebenda quam tu in eadem ecclesia sibi donasti tempore predecessorum ejus non erat alicujus certi valoris nec consistebat in aliquo certo loco sed tantummodo in commune que quandoque plus quandoque minus pro temporum varietate valebat ejusque proventus sive presentes essent sive absentes percipiebant in duobus terminis annuatim Postmodo vero quia valde pauci canonici residentiam in ecclesia faciebant fuit de tua et ipsorum decani et capituli voluntate provisum ut illi tantummodo qui residentiam facerent et officiis interessent communem perciperent equis inter se partibus dividendam et quicunque prebendam illam haberet quam dictus magister nunc obtinet nisi residentiam faceret tantummodo sex marcas pro sua prebenda in duobus terminis annuatim perciperet de commune Si vero residentiam faceret partem totius commune que ipsum contingeret una cum pretaxatis sex marcis sine diminutione perciperet sicut alii residentes Nunc autem quia prebenda illa quam contulisti prefato magistro respectu aliarum nimis videtur exilis ecclesiam de Trokelinton ad tuam donationem spectantem addidisti illi prebende Sed dicti decanus et capitulum illas sex marcas quas constituerant loco prebende volunt sibi subtrahere inherentes cuidam verbo quod in Constitutione ipsorum dicitur contineri videlicet quod canonicus qui habet prebendam illam pro ea sex marcas de commune percipiat annuatim nisi fuerit in certis reditibus sibi provisum quod quidem videtur absurdum cum iidem illi prebende nihil addant nec de corporibus prebendarum suarum aliquid alicui subtrahatur et si sex ille marce subtraherentur que loco substantie prebende statute fuerunt illa prebenda quodammodo esse desineret et sic videretur nil adjici sibi posse sed nova videretur creari prebenda Cum igitur indecens sit ut dictus magister prima substantia prebende sue accidentis vel potius accedentis emolumenti occasione fraudetur universitatem eorum rogamus et monemus attente nostris sibi dantes literis in mandatis ut illas sex marcas eidem magistro sive presens fuerit sive absens Constitutione ipsorum nequaquam obstante annuatim sine difficultate persolvant et si residentiam fecerit nihil subtrahant ei de aliis que ad eum pertinent de commune mandatum nostrum taliter impleturi quod ex justitia grata sibi facere videantur et nos devotionem ipsorum possimus merito commendare Volentes itaque predicto magistro favorabiliter in jure suo adesse ac si quod forte in hac parte juri deesset suppleri de gratia intendentes fraternitati tue per Apostolica scripta mandamus quatenus si dicti decanus et capitulum mandatum nostrum neglexerint adimplere tu eos ad id per censuram ecclesiasticam appellatione remota compellas Datum Laterani xviij kalendas Januarii anno undecimo