Charter Document - 07010573
| Charter Number: | 07010573 |
|---|---|
| Cartulary Title: | The Register, or Rolls, of Walter Gray, Lord Archbishop of York |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1221 |
| Date type: | Internal, Calendar, Episcopal |
| Resource Link(s): |
|
Charter:
Universis Sancte matris ecclesie filiis ad quos presens scriptum pervenerit Walterus Dei gratia Eboracensis archiepiscopus Anglie primas eternam in Domino salutem Cum quedam disparitas quoad distributionem commune in ecclesia Eboracensis usque ad tempora nostra obtenta ut videlicet alii integram communem alii dimidiam alii etiam majorem alii minorem perciperent quampluries extiterit seminarium dissensionis et discordie inter fratres nos exemplo Veteris Testamenti ubi legitur Non arabis in bove et asino nec indueris veste lana et lino contexta hujusmodi disparitatem et radicem contentionis amputare volentes et omnes fratres in distributione dicte commune purificare ecclesiam de Horneby cum terris capellis et omnibus ad eam pertinentibus collatam nobis ab abbate et conventu Sancte Marie Eboracensis in usus Eboracensis ecclesie convertendam decano et canonicis Eboracensis ecclesie in proprios usus communitatis eorum ad dictam paritatem inter fratres perficiendam de consensu dilecti filii Willelmi archidiaconi Richemund sicut in ejus autentico plenius continetur damus et concedimus et presentis scripti patrocinio confirmamus ita liberam et quietam ab omni episcopali et archidiaconali consuetudine sicut ecclesiam de Burgo liberius possidere noscuntur His testibus magistris W de Bodeham archidiacono Notingham Johanne Romano et Ricardo Cornub canonicis Ada de Staveley canonico Suwell Roberto de Gray Willelmo Martel Ricardo de Bereford Willelmo de Vescy Waltero Chalouns Odone de Rychemund et aliis Data apud Berwyk xj kalendas Junii pontificatus nostri anno sexto