Charter Document - 06810021
| Charter Number: | 06810021 |
|---|---|
| Cartulary Title: | A Monastic Community in Local Society: The Beauchief Abbey Cartulary |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1247 - 1312 |
| Date type: | Assigned |
| Resource Link(s): |
|
Charter:
Omnibus Cristi fidelibus hoc scriptum visuris vel audituris Thomas filius Willelmi de Chaworth salutem in Domino Noverit universitas vestra me dedisse concessisse et hac presenti carta mea confirmasse Deo et ecclesie beati Thome martiris de Bello Capite et canonicis ibidem Deo servientibus unam bovatam terre cum pertinenciis quam Adam filius Johannis del Clyfe aliquando tenuit de me in territorio de Norton et quinque acras assarti cum una parcella in bosco de Norton quas idem Adam tenuit de me et ipsum Adam cum tota sequela sua et eorum catallis et unam bovatam terre in territorio de Bradway et octo acras assarti in dicto bosco de Norton cum omnibus pertinenciis quas Thomas filius Hugonis de bosco tenuit de me et ipsum Thomam cum tota sequela sua et eorum catallis et dimidiam bovatam terre cum pertinenciis in Kocschit quam Wynnora tenuit de me et ipsam Winnoram cum tota sequela sua et eorum catallis et unum assartum cum uno tofto cum pertinenciis in eadem villa quod Henricus le Bercher tenuit de me et sex acras terre cum pertinenciis iacentes juxta aquam de Scheve quas Ricardus de Mora tenuit de me et quater viginti acras terre cum pertinenciis in bosco de Norton iacentes ex parte aquilonari parci abbatis et conventus de Beauchefe sicut eisdem sunt assignate et mensurate ad assartandum et seminandum et includendam et ad omnimodum comodum suum inde faciendum Hec omnia prenominata cum omnibus pertinenciis dedi dicte ecclesie de Beauchef et canonicis ibidem servientibus in liberam puram et perpetuam elemosinam libera et quieta ab omnibus secularibus serviciis sectis consuetudinibus vel demandis Et ego Thomas de Chaworth et heredes mei predictas bovatas terre sine aliquo retene mento et predictos tenentes cum tota sequela sua et eorum catallis in predictos quatuor viginti acras terre et dimidiam bovatam terre in Kokechite et predictas sex acras terre juxta Scheve cum omnibus aliis assartis prenominatis cum pertinenciis libertatibus communiis et asiamentis dictis bovatas et assartis pertinent[ibus] dictis ecclesie et canonicis in liberam puram et perpetuam elemosinam contra omnes gentes warantizabimus acquietabimus et defendemus inperpetuum Hiis testibus Thoma de Leghys Thoma de Bramton Petro de la Wodehous Hugone filio suo Petro Byrcheheved et aliis