Charter Document - 06810001

Lucius episcopus servus servorum Dei dilectis filiis Hugoni abbati Premonstrat[ens]i [] abbatibus et canonicis Premonstrat[ensis] ordinis tam presentibus quam futuris regularem vitam professis inperpetuum In eminenti apostolice sedis specula licet immeriti disponente domino constituti pro singulorum statu solliciti esse compellimur et ea sincere tenemur amplecti que ad incrementum religionis pertinent et ad virtutum spectant ornatum quatinus religiosorum quies ab omni sit perturbacione secura et a jugo mundane oppressionis servetur illesa cum apostolica fuerit tuicione munita Attendentes itaque quomodo religio et ordo noster multa refulgens gloria meritorum et gracia redolens sanctitatis palmites suos a mari usque ad mare extenderit ipsum ordinem et commensales domos eiusdem ordinis apostolice proteccionis presidio duximus confovendos et presenti privilegio muniendas Ea propter dilecti in Domino filii vestris justis postulacionibus benignius annuentes ad exemplum felicis recordacionis Alexandri pape predecessoris nostri universas regulares instituciones et disposiciones quas de communi concensu vel maioris et sanioris partis fecistis sicut inferius denotatur auctoritate apostolica roboramus et presentis scripti patrocinio communimus Videlicet ut ordo canonicus quemadmodum in Premonstratensi ecclesia secundum beati Augustini regulam et disposicionem recolende memorie Norberti quondam Premonstratensis ordinis institutoris et successorum suorum in candido habitu constitutus esse dinoscitur per omnes eiusdem ordinis ecclesias perpetuis temporibus inviolabiliter observetur et eedem penitus observancie i[i]dem quoque libri qui ad divinum officium pertinent ab omnibus eiusdem ordinis ecclesiis uniformiter teneantur nec aliqua ecclesia vel persona ordinis nostri adversus communia ipsius ordinis instituta privilegium aliquod postulare vel obtentum audacter quomodo libet retinere Nulla eciam ecclesiarum eius quam genuit quamlibet terreni comodi exactionem imponat Set tantum pater abbas curam de profectu tam abbatis filii quam fratrum domus illius habeat Et potestatem habeat secundum ordinem corrigendi que in ea noverit corrigenda et illi ei tanquam patri reverenciam filialem humiliter exhibeant Abbas autem Premonstratensis ecclesie que mater esse dinoscitur aliarum non solum in ecclesiis illis quas constituit set eciam in omnibus aliis eiusdem ordinis et dignitatem patris obtineat et officium et ei ab omnibus tam abbatibus quam fratribus debita obediencia impendatur Preterea omnes abbates ordinis nostri singulis annis ad generale capitulum Premonstratum post posita omni occasione conveniant illis solis exceptis quos a labore vie corporis retardaverit infirmitas qui tamen idoneum delegare debent nuncium per quem necessitas et causa remoracionis sue capitulo fuerit constitutus In quo nimirum capitulo precedente abbate Premonstratensi ceterisque confidentibus et in spiritu Dei cooperantibus de hiis que ad edificacionem animarum ad instruccionem morum et ad informacionem virtutum atque incrementum regularis discipline spectabunt sermo diligens habeatur Porro de omnibus questionibus et querelis tam spiritualibus quam temporalibus que in ipso capitulo proposite fuerint illud teneatur irrefragabiliter et observetur quod abbas Premonstratensis cum hiis qui ad sanioris consilii et magis idonei apparuerint juste ac provide judicabit Sane si abbas aliquis vestri ordinis infamis vel inutilis aut ordinis sui prevaricator inventus fuerit et prius per abbatem patrem suum aut per nuncios eius ammonitus suum corrigere et emendare delictum neglexerit aut cedere si amovendus fuerit sponte noluerit auctoritate generalis capituli deponatur et depositus sine dilacione ad aliquam ordinis domum in qua auxilio capituli generalis et prece propria graciam introitus invenire potuerit revertatur in obediencia abbatis sicut ceteri fratres ipsius domus firmiter permansurus Id ipsum eciam ullo tempore si necesse fuerit et capitulum sine scandalo vel periculo expectari non poterit per abbatem Premonstratensem et patrem abbatem et alios abbates quos vocaverit fieri licebit Quod si depositus in se date sentencie contumaciter contrariare temptaverit tam ipse quam principales eius qui de ordine vestro fuerint in sua contumacia fautores ab abbate Premonstratensi et ceteris abbatibus censura ecclesiastica donec satisfaciant coherceantur Verum cum aliqua ecclesiarum vestrarum abbate proprio fuerit destituta sub patris abbatis potestate ac disposicione consistat et cum eiusdem consilio qui eligendus fuerit a fratribus eligatur Electo autem fratres ecclesie statim obedienciam promittant qui non quasi absolutus a potestate patris abbatis vel ordinis sui archiepiscopo vel episcopo in cuius dioecesi fuerit presentetur plenitudinem officii ab eo percepturus ita tamen quod post factam archiepiscopo vel episcopo suo professionem occasione illa non transgrediatur instituciones ordinis sui nec in aliquo eius prevaricator existat Si quis eciam ex vobis canonice electus in abbatem dioecesano episcopo semel et iterum per abbates vestri ordinis presentatus benediccionem ab eo non potuerit optinere ne ecclesia ad quam vocatus est destituta consilio periclitetur officio et loco abbatis plenaria secundum ordinem fungatur in ea tam in exterioribus providendis quam in interioribus corrigendis donec aut interventu generalis capituli vestri aut precepto Romani pontificis seu metropolitani benediccionem suam obtineat Ceterum si aliqua ecclesiarum vestrarum pastoris solacio destituta inter fratres de substituendo abbate discordia fuerit vel cessura oborta et ipsi facile ad concordiam vel unitatem revocari nequiverint pater abbas concilio coabbatum suorum eis idoneam provideat personam et illi eam sine contradiccione recipiant in abbatem Quam si recipere contempserint sentencie subiaceant quam pater abbas cum consilio coabbatum suorum in eos duxerit auctoritate ordinis promulgandam Si que autem ecclesie canonicorum alterius ordinis ad ordinem vestrum venerint ad eam ecclesiam vestri ordinis habeant sine refragacione respectum in qua vestrum noscuntur ordinem assumpsisse Nulla sane ecclesiastica persona [pro chrismate aut consecrationibus et ordinationibus aut pro sepultura pretium aut] pro benedicendo abbate et deducendo in sedem suam pale fidum aut aliquid aliud exigere nullus abbatum vestrorum eciam si exigatur dare presumat quia et exigenti et danti nota simoniace pravitatis imminet et periculum Ad hec quoniam Premonstratensis ecclesia prima mater est omnium ecclesiarum tocius ordinis et patrem super se alium non habet sicut ad cautelam et custodiam ordinis statutum est per tres primos abbates scilicet de Lauduno et de Floressia et de Cussiaco annua visitacio ibidem fiat et si quid in ipsa domo corrigendum fuerit absque maiori audiencia per eos corrigatur Quod si abbates in corrigendo tepidus et fratres sepius moniti incorrigibiles permanserint ad generale capitulum referatur et sicut melius visum fuerit consilio generalis capituli emendetur et sentencia in hac parte capituli sine retraccione aliqua observetur Quociens vero ecclesia Premonstratensis sine abbate fuerit ad prefatos tres abbates eius curia respiciat et a canonicis ipsius ecclesie cum eorum consilio persona in abbatem idonea eligatur ad consilium suum quattuor aliis abbatibus ad eandem ecclesiam pertinentibus pariter advocatis quos ipsi canonici providerint advocandos Liceat quoque unicuique matri ecclesie ordinis vestri cum consilio abbatis Premonstratensis de abbatibus ecclesiarum que ab ea processisse noscuntur [sive etiam de alia ejusdem ordinis inferiore Ecclesia sibi] quemcumque voluerit si tamen idoneus fuerit in abbatem assumere Personam autem de alio ordine nulla ecclesiarum vestrarum sibi eligat in pastorem nec vestri ordinis aliqua in abbatem monasterii alterius ordinis nisi de auctoritate Romane ecclesie ordinetur Nulli eciam canonicos vel conversos vestros sine licencia abbatum recipere aut susceptos liceat retinere Si qua vero inter aliquas ecclesias vestri ordinis de temporalibus questio emerserit non extra ordinem ecclesiastica vel secularis audiencia requiratur set mediante Premonstratensi abbate et ceteris quos vocaverit aut caritative inter eas conponatur aut auditis utriusque racionibus eadem controvercia iusto judicio terminetur Similiter si aliqua in ordine vestro inter prelatos et subiectos suos dissensio vel controversia pro qualibet occasione orta fuerit nequaquam ecclesiastica aliquave secularis audiencia requiratur set in ipso ordine consilio et judicio ordinis terminetur Quia vero singula que ad religionis profectum et animarum salutem ordinastis presenti abbreviacioni nequiverunt annecti nos cum hiis que prescripta sunt consuetudines vestras quas inter vos religionis intuitu regulariter statuistis et deinceps auctore Deo statuetis auctoritate apostolica roboramus et vobis vestrisque successoribus et omnibus qui ordinem vestrum professi fuerint perpetuis temporibus inviolabilitur observandas decernimus Ad maiorem quoque ordinis vestri reverenciam et regularis discipline observanciam vobis filii abbates subiectos vestros ligandi et solvendi plenam concedimus facultatem De cetero quoniam a strepitu et tumultu seculari remoti pacem et quietem diligitis grangias vestras sicut et atria ecclesiarum a pravorum incursu et violencia libera fore sanctimus prohibentes ut ibi nullus hominem capere spoliare verberare seu interficere aut furtum vel rapinam committere audeat Ob evitandas vero secularium [virorum] frequencias liberum sit vobis salvo jure dioecesanorum episcoporum oratoria in grangiis vestris constituere et in ipsis vobis et familie vestre divina officia cum necesse fuerit celebrare Prohibemus insuper ne aliqua persona fratres ordinis vestri audeat ad secularia iudicia provocare set si quis adversus vos aliquid sibi crediderit de jure competere sub ecclesiastici examine iudicii experiendi habeat facultatem Preterea presentis scripti auctoritate firmamus ut de novalibus vestris seu de nutrimentis animalium vestrorum nulla ecclesiastica secularisve persona decimas a vobis exigere presumat Decernimus ergo ut nulli omnino hominum liceat prefatum monasterium vel ceteras eius abbatias et obediencias temere perturbare aut earum possessiones auferre vel ablatas retinere minuere seu quibuslibet vexacionibus perturbare set omnia integra conserventur eorum pro quorum gubernacione concessa sunt usibus profutura omnimodis salva sedis apostolice auctoritate Si qua igitur in futurum ecclesiastica secularisve persona hanc nostre constitucionis paginam sciens contra eam temere venire temptaverit secundo terciove commonita nisi presumpcionem suam digna satisfaccione correxerit potestatis honorisque sui dignitate careat reamque se divino iudicio existere de perpetrata iniquitate cognoscat et a sacratissimo corpore ac sanguine Dei et domini redemptoris nostri Jhesu Cristi aliena fiat atque in extremo examine districte ulcioni subiaceat Cunctis autem eisdem locis sua jura servantibus sit pax domini nostri Jhesu Cristi quatinus et hic fructum bone accionis percipiant et apud districtum iudicem premia eterne pacis inveniant Amen + Ego Johannes presbiter cardinalis tituli sancti Marci + Ego Petrus presbiter cardinalis tituli sancte Susanne + Ego Laborans presbiter cardinalis sancte Marie transtyberim tituli Calixti + Ego Pand[ulfus] presbiter cardinalis tituli basilice xii apostolorum + Ego Lucius Catholice ecclesie episcopus + Ego Theodinus Portuensis et sancte Rufine sedis episcopus + Ego Paulus Prenestinus episcopus + Ego Jac[inthus] sancte Marie in Cosmidin diaconus cardinalis + Ego Ardicio diaconus cardinalis sancti Theodori + Ego Gracianus sanctorum Cosme et Damiani diaconus cardinalis + Ego Octavianus sanctorum Sergii et Bachi diaconus cardinalis + Ego Albinus diaconus cardinalis sancte Marie nove Datum Anagnie per manum Alberti sancte Romane ecclesie presbiteri cardinalis et cancellarii vj idus Marcii indiccione ij incarnacionis Dominice anno MCLXXXIIJ pontificatus domini Lucii pape iij anno tercio