Charter Document - 06791004

Anno gracie MCC sexagesimo sexto ad Pentecosten facta est hec conuencio inter [] Magistrum et fratres Hospitalis sanctorum Iacobi et Iohannis de Brackele ex parte vna et venerabilem patrem Robertum dei gracia Episcopum Dunblanensem ex altera quod dicti Magister et fratres concesserunt et tradiderunt ad firmam dicto Episcopo ecclesiam suam de Gasknes cum omnimodis fructibus et prouentibus suis et omnibus iuribus et libertatibus ad ipsam quocunque m[odo] pertinentibus vna cum omnibus terris et possessionibus ad dictos [] Magistrum et fratres quocunque titulo in regno Scocie pertinentibus vsque ad terminum quinque annorum completorum pro viginti quatuor Marcis sterlingorum annuis soluendis predictis [] Magistro et fratribus singulis annis in Monasterio de Oseney in festo sancti Michaelis archangeli uel infra octo dies sequentes termino prime solucionis incipiente in festo sancti Michaelis anno gracie MCC sexagesimo septimo Quid vero pro fructibus anni sexagesimi sexti non fuerat suo tempore satisfactum satis fiet in fine termini de viginti quatuor marcis pro eisdem Nec fiet de bonis spectantibus ad testamentum memorati Episcopi aliqua distribucio si humanitus de eo contingat nisi prius dictis [] Magistro et fratribus super predicta pecunia plene fuerit satisfactum Si vero cesserit Episcopatui et de predictis viginti quatuor Marcis satisfacere recusauerit uel neglexerit penam dupli incurret predictis f[ratribus persolu]endam Si autem placuerit dicto Episcopo ipsas ecclesiam et terra[s post] ill[ud qui]nq[uenniu]m ad firmam tenere innouabitur conuencio usque ad aliud quinquennium [Episcopo] predicto et pro firma predicta Et sic de quinquennio in quinquennium quamdiu placuerit eidem Episcopo ipsas ad firmam tenere Ita tamen quod p[retextu presencium] nullum ius successori ipsius Episcopi accrescat in dictis ecclesia et terris Si infra terminum aliquem dum ipsas tenuerit de ipso humanitus contigerit sed ad ipsos [] Magistrum et fratres sine omni contradiccione dicto [Episcop]o cedente uel decedente reuertantur Colminus vero qui est homo ligius dictorum [] Magistri et fratrum a dictis terris non amouebitur dum Episcopus ipsas habuerit ad firmam nec iniuste in aliquo fatigabitur nec ad placita extra dictas terras per ipsum trahetur sed benigne prout decet tractabitur Ad hec si vicaria dicte ecclesie durante firma Episcopi vacauerit licebit dictis [] Magistro et fratribus presentare ydoneam personam ad eandem quam Episcopus sine difficultate ad ipsam admittet et in eadem vicarium constituet Idem vero Episcopus sustentabit domos in fundo ecclesie existentes cum competenter fuerint reparate in statu in quo ipsas receperit nisi vetustate uel tempestate aut aliquo casu inopinato ipsi Episcopo et suis non inputando corruerint Preterea dictus Episcopus soluet singulis annis Abbati et Conuentui de Insula Missarum viginti solidos et vicario dicte ecclesie qui pro tempore fuerit duas Marcas preter viginti quatuor Marcas antedictas Et omnia onera ordinaria subportabit quantum ad dictos [] Magistrum et fratres pertinebit Extraordinaria vero faciet de firma dictorum [] Magistri et fratrum prout iustum fuerit Si autem contigerit quod absit quod dicti [] Magister et fratres per defectum solucionis predicte firme dictis loco et terminis non facte dampna incurrerint aut expensas fecerint idem Episcopus tenebitur eisdem ad satisfaccionem super dampnis et expensis vna cum interesse suo super quibus stabitur simplici et fideli assercioni dictorum [] Magistri et fratrum uel vnius eorum capellani habentis potestatem in eorum animas iurandi ad hoc specialiter deputati Et si idem Episcopus contra solucionem hujusmodi dampnorum uel expensarum reluctauerit penam quadraginta Marcarum incurrat predictis [] Magistro et fratribus soluendam Et sciendum est quod cum non placuerit dicto Episcopo firmam vlterius tenere predicta ecclesia cum omnibus fructibus suis ad dictos [] Magistrum et fratres in festo Pentecostes reuertetur fructus vero et commodum terrarum vsque ad festum sancti Martini proximo sequens in Mense nouembris ad dictum Episcopum pertinebunt Vtraque vero pars in verbo veritatis et sacerdocij istam conuencionem in omnibus et per omnia fideliter obseruare promisit Subiecerunt se vero dicte partes iurisdiccioni seu cohercioni Lincolniensis Episcopi qui pro tempore fuerit quod possit ad predictorum obseruacionem omnium et singulorum per interdicti et excommunicacionis sentencias partem contra supradicta in aliquo venientem cohercere Promisit insuper dictus Episcopus quod circa illicite alienata et distracta diligenciam apponet vt restituantur Et ad maiorem securitatem huius conuencionis parti cirographi penes [] Magistrum et fratres residenti appensum est sigillum Episcopi vna cum sigillo sedis Dunblanensis Parti vero penes Episcopum residenti appensum est sigillum commune predictorum [] Magistri et fratrum Hiis testibus Domino Alano dei gracia Abbate de Insula Missarum Domino Henrico Decano Dunblanensi Magistro Ricardo de Striuelyn Officiali Dunblanensi Adam Iohanne Willelmo de Gasknes de Abberrothewon et foules ecclesiarum vicariis et Multis aliis