Charter Document - 06791003
| Charter Number: | 06791003 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1251 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Innocentius episcopus seruus seruorum dei Dilectis filijs Magistro Abel Capellano nostro sancti Andree et Theuidalie Glasguensis dioecesis Archidiaconis ac Johanni de Euerlay Canonico Dunkeldensi Salutem et apostolicam benedictionem Ex parte Prepositi et Capituli secularis ecclesie sancte Marie in Ciuitate sancti Andree fuit propositum coram nobis quod cum Prior et Conventus Cathedralis ecclesie sancti Andree ordinis sancti Augustinj asserentes fore ipsis ab apostolica sede concessum ut cedentibus uel decedentibus Canonicis ipsius ecclesie sancte Marie ijdem Prior et Conuentus prebendas et possessiones eorum possint eorum usibus applicare super hoc et rebus alijs contra eos ad dilectos filios de kitham et de sancto Oswaldo Priores Eboracensis dioecesis sub certa forma litteras apostolicas impetrassent ipsi in eos nulla competenti monitione premissa sine causa rationabili excommunicationis sententiam promulgarunt contra statuta concilij generalis vnde nos eisdem nostris damus litteris in mandatis ut si est ita sententiam ipsam infra octo dies post susceptionem litterarum ipsarum sine qualibet difficultate relaxent Quocirca discretioni uestre per apostolica scripta mandamus quatinus si dicti Priores mandatum nostrum infra prescriptum tempus neglexerint adimplere uos ex tunc sufficienti ab eis super hijs pro quibus excommunicati habentur cautione recepta iuxta formam ecclesie sententiam relaxetis eandem et iniuncto eis quod de iure fuerit iniungendum audiatis causam et eam infra Quatuor menses post receptionem presentium iudicio uel concordia si de partium uoluntate processerit terminare curetis Quod si forte hoc fieri non poterit eam ex tunc instructam uel non instructam remittatis ad apostolice sedis examen prefigentes partibus terminum peremptorium competentem quo per se uel procuratores idoneos cum omnibus actis iuribus rationibus et munimentis earum compareant coram nobis iustam dante domino sententiam recepture Prouiso ut si pro manifesta offensa dicta sit prolata sententia nisi prius ab excommunicatis sufficiens pre[ste]tur emenda nullatenus relaxetur Testes autem qui fuerint nominati si se gratia odio uel timore subtraxerint per censuram ecclesiasticam cessante appellatione cogatis ueritati testimonium perhibere Quod si non omnes hijs exequendis potueritis interesse duo uestrum ea nih[il]ominus exequantur Datum Lugduni vij Idus Aprilis Pontificatus nostri Anno Octauo