Charter Document - 06790126
| Charter Number: | 06790126 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Religious |
| Charter Type(s): | Concession |
| Date: | 1318 |
| Date type: | Internal, A.D., Feast |
| Resource Link(s): |
Reference Document for this Embedded Document People of Medieval Scotland |
Charter:
Vniuersis sancte matris ecclesie filijs ad quos presentes littere peruenerint Willelmus miseracione diuina ecclesie Dunkeldensis minister humilis salutem in domino sempiternam Nouerit vniuersitas vestra nos de vnanimi consensu et assensu capituli nostri habito super hoc prius inter nos in capitulo nostro Diligenti et frequenti ac solemni tractatu caritatis intuitu pro cultu diuino augendo et hospitalitate tenenda concessisse et contulisse inperpetuum Religiosis viris Abbati de insula missarum et canonicis eiusdem Monasterij per Disposicionem sui Abbatis Deo inperpetuum seruituris in capella Sancti Felani in Blendochred nostre dioecesis ibidem per predictum Abbatem qui pro tempore fuerit mittendis ponendis et amouendis Ita tamen quod secundum situm loci et facultates eiusdem sufficiens numerus canonicorum inibi ordinetur et inueniatur Ecclesiam de Killyn cuius ius patronatus Dominus noster Dominus Robertus Dei gracia Rex Scottorum illustris ipsius Ecclesie verus patronus prius concessit dictis Religiosis cum terris et omnibus alijs reditibus obuencionibus et iuribus quibuscunque ad dictam Ecclesiam pertinentibus seu pertinere valentibus ad vsus suos proprios saluis nobis et successoribus nostris inperpetuum Episcopalibus et Archidiaconis Ecclesie Dunkeldensis qui pro tempore fuerint omnibus que de dicta Ecclesia solebant habere seu percipere Ita videlicet quod omnes fructus et prouentus dicte Ecclesie cum pertinencijs conuertantur per ordinacionem predicti Abbatis in vsus Prioris et Canonicorum commorancium ad dictam Capellam pro cultu diuino Et prior presentandus ad prioratum dicte Capelle per Abbatem et Conuentum dicti Monasterij quocienscunque et quandocunque ipsum prioratum contigerit vacare nobis et successoribus nostris presentetur et a nobis et successoribus nostris instituatur et curam suscipiat Et sciendum est quod predicti Religiosi viri Abbas et Conuentus dicti Monasterij presentabunt nobis et successoribus nostris qui pro tempore fuerint ad vicariam dicte Ecclesie de Killyn vnum Canonicum vel vnum capellanum secularem si quem maluerint qui curam dicte Ecclesie [gerat] et respondeat de eadem cuius porcionem pro sustentacione sua et pro iuribus nostris Episcopalibus et Archidiaconalibus soluendis taxamus decem libras sterlingorum et volumus taxari in futurum In cuius rei testimonium presentibus sigillum nostrum apposuimus Et ad huius rei euidenciam pleniorem et confirmacionem maiorem sigillum commune capituli nostri presentibus est appensum Datum apud Dunkeldene in capitulo nostro Die Iouis proxima ante festum apostolorum Symonis et Iude anno Domini Millesimo Tricentesimo decimo Octauo