Charter Document - 06790111
| Charter Number: | 06790111 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1272 - 1292 |
| Date type: | Assigned |
| Resource Link(s): |
People of Medieval Scotland |
Charter:
Cum inter viros Religiosos Andream dei gracia Abbatem de cupro et eiusdem loci conuentum ex parte vna et hugonem eiusdem gracia Abbatem de insula missarum et eiusdem loci conuentum ex altera suborta fuisset materia questionis super quodam annuo redditu duodecim librarum cere quem quidem redditum Idem Abbas et conuentus de cupro sibi annuatim deberi dicebant de quibusdam domibus et terris sitis in villa de Perth quas magister Willelmus Dunstane et Michael dictus de Inchaffraan ad feodo firmam tenent de dicto monasterio de insula missarum Tandem licet monasterium predictum de insula missarum predictas domus et terras ab huiusmodi redditus sere prestacione liberas et inmunes triginta et nouem annos et amplius possedissent ac de jure vel possessione dictorum Abbatis et conuentus de Cupro in hac parte sufficienter non liqueret interuenientibus tamen communibus amicis inter partes ipsas huiusmodi amicabilis composicio et specialis conuencio interuenit videlicet quod prefati Abbas et conuentus de Cupro dictum Annuum redditum cere nunc quam decetero peterent vel petere poterunt Predicti vero Abbas et conuentus de insula missarum pro bono pacis et redempcione vexacionis sue super reditu predicto supradictis Abbati et conuentui de Cupro et eorum monasterio reddent annuatim inperpetuum duas libras cummini et duas libras peperis infra octavas natiuitatis beati Iohannis baptiste in capella pontis de perth Quod si Dicti Abbas et conuentus de insula missarum in solucione dicti redditus peperis et cummini in totum vel partem cessauerint quod absit licebit prefatis Abbati et conuentui de Cupro de licencia balliuorum domini Regis de Perth qui pro tempore fuerint tam infra domus quam extra distringere et namos capere donec de dicto Redditu et eius arreragijs si que fuerint plene fuerit eis satisfactum ad hanc autem composicionem fideliter et sine fraude perpetuo obseruandam Abbates predicti pro se et suis conuentibus Iuramento corporaliter et canonice interposito se et monasteria sua obligauerunt et ad maiorem huius composicionis securitatem partes prenominate renunciauerunt in hac parte pro se et successoribus suis inperpetuum exceptioni doli et condicioni ex lege et sine causa vel i[n]iusta causa beneficio restitucionis in integrum et nouarum constitucionum omnibus eciam inhibicionibus et constitucionibus et impetracionibus et literis tam regijs quam apostolicis et specialiter super bonis alienatis et distractis necnon gracijs indulgencijs et priuilegijs contra composicionem presentem impetratis et impetrandis ac omni accioni et excepcioni consuetudini et statuto necnon omni cauillacioni et impugnacioni ac omnibus auxilijs et remedijs tam Iuris quam facti quibus presens composicio et eius effectus possent impugnari vel infirmari seu impediri vel deferri In cuius rei testimonium parti huius cirograffi penes predicto[s] Abbatem et conuentum de insula missarum residenti appositum est sigillum comune predicti Monasterij de Cupro parti vero cirograffi [penes predictos Abbatem et conuentum de Cupro] residenti appositum est sigillum comune monasterij de insula missarum Datum apud villam de Perth die natiuitatis sancti Iohannis baptiste Anno gracie Millesimo CC[XC] secundo