Charter Document - 06790108
| Charter Number: | 06790108 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1278 |
| Date type: | Internal, A.D., Feast |
| Resource Link(s): |
People of Medieval Scotland |
Charter:
Vniuersis cristi fidelibus presens scriptum visuris uel audituris [] Iohannes Cumyne filius bone memorie quondam Domini Iohannis Cumyne salutem eternam in domino Nouerit uniuersitas vestra nos pro salute anime nostre et uxoris nostre ac liberorum nostrorum et precipue pro anima inclite memorie dicti Domini Iohannis Cumyne patris nostri ac antecessorum nostrorum dedisse et concessisse et ac presenti carta nostra confirmasse pro nobis et heredibus nostris in perpetuum deo et beate marie ac sancto Iohanni apostolo et evangeliste et viris religiosis abbati et conuentui Monasterii de Insula Missarum et eorum hominibus in puram et perpetuam elemosinam liberam potestatem transeundi cum animalibus cariagiis et aliis bonis suis per publicam viam que ducit a dicto Monasterio per nigrum vadum qui scotice dicitur athebethy in nemore nostro de Rosmadirdyne usque ad villam de Perthe pontemque ibidem firmandi super terram nostram et firmatum sustentandi sumptibus dictorum abbatis et conuentus eodem que ponte utendi in perpetuum pro libero sue voluntatis arbitrio sine aliqua reclamacione contradiccione aut grauamine nostri uel heredum nostrorum vnde firmiter inhibemus seruientibus nostris qui pro tempore fuerint dictum nemus nostrum custodientibus et in posterum custoditurus ne dictis religiosis seu eorum hominibus cum per dictum pontem et viam transierint predictam pro negociis suis expediendis in rebus suis aut personis Molestiam dampnum aliquod aut grauamen eis aut eorum cuiquam inferre presumant volumus eciam pro nobis et heredibus nostris quod si contingat animalia dictorum abbatis et conuentus aut hominum suorum in pasturam nostram transgressum facere unum denarium argenti pro quolibet transgressu dictorum animalium nomine pene sine maiori exaccione seruientibus nostris et heredum nostrorum persoluant nisi animalia dictorum religiosorum abbatis et conuentus sev hominum eorundem in nostra pastura predicta de nocte uel die pastore tenente uel pascente inueniantur pascencia Nos vero et heredes nostri dictam donacionem nostram ut predictum est contra omnes homines in perpetuum warantizabimus et defendemus In cuius rei testimonium huic scripto sigillum nostrum apponi fecimus Datum apud Gasknes die lune proxima ante festum sancte Marie Magdalene Anno gracie MCC septuagesimo octauo Hiis testibus Dominis Willelmo et Alexandro fratribus nostris dominis Nicholao de vepunt et Philippo holifarde Militibus Alano clerico Fergusio Mac kenedi Hugone fabro Alano seruiente nostro et multis aliis