Charter Document - 06790104
| Charter Number: | 06790104 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1274 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Gregorius episcopus seruus seruorum dej Dilecto filio Decano ecclesie Dumblanensis Salutem et apostolicam benedictionem Ad nostram noueris audientiam peruenisse quod tam dilecti filij Abbas et Conuentus Monasterij de Inchafran ordinis sancti Augustini Dumblanensis dioecesis quam predecessores eorum decimas terras possessiones redditus domos Casalia Molendina iura iurisdictiones et quedam alia bona ipsius Monasterij datis super hoc litteris interpositis iuramentis factis renuntiationibus et penis adiectis in grauem ipsius Monasterij lesionem nonnullis clericis et laicis aliquibus eorum ad uitam quibusdam uero ad non modicum tempus et alijs perpetuo ad firmam uel sub censu annuo concesserunt Quorum aliqui super hijs confirmationis litteras in forma communj a sede apostolica impetrasse dicuntur Cum igitur nostra intersit lesis Monasterij subuenire discretioni tue per apostolica scripta mandamus quatinus ea que de bonis prefati Monasterij per concessiones huiusmodi alienata inueneris illicite uel distracta non obstantibus litteris penis iuramentis renuntiationibus et confirmationibus supra dictis ad ius et proprietatem ipsius Monasterij legitime reuocare procures Contradictores per censuram ecclesiasticam appellatione postposita compescendo Testes autem qui fuerint nominati si se gratia odio uel timore subtraxerint censura simili appellatione cessante compellas ueritati testimonium perhibere Datum Lugduni Idibus Julij Pontificatus nostri Anno Tertio