Charter Document - 06790090
| Charter Number: | 06790090 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Religious |
| Charter Type(s): | Inspeximus |
| Date: | 1263 |
| Date type: | Internal, A.D., Calendar, Episcopal |
| Resource Link(s): |
People of Medieval Scotland |
Charter:
Vniuersis sancte Matris ecclesie filijs presens scriptum visuris vel Audituris Ricardus permissione diuina Dunkeldensis episcopus eternam in domino salutem Noueritis nos ad plenum inspexisse bone memorie Johannis primi Ricardi Johannis secundi hugonis Gilberti et Galfridi predecessorum nostrorum episcoporum scilicet Dunkeldensium Donaciones concessiones et confirmaciones Monasterio de Inchaffryn et canonicis ibidem deo seruientibus et seruituris factas super ecclesia de Maddirnyn cum omnibus pertinencijs suis et super terra de Maddirnyn que Abthan dicitur et super quieta clamacione de Cane et de Coneuethe que clerici Dunkeldenses de eadem Abthane antiquitus percipere consueuerunt et cum de Jure non possumus nec volumus eorum honesto facto iniuste contraire nec pias eorum collaciones pauperi monasterio factas infirmare Nos eodem spiritu pietatis ducti quo et illi de consensu capituli ecclesie Dunkeldensis Donaciones concessiones et confirmaciones dicte ecclesie et predicti Abthane et supradictam quitum clamacionem eisdem canonicis factas Ratas et gratas habentes et concedimus et inperpetuum confirmamus salua nobis et successoribus nostris vna Marca argenti annuatim de eodem Abthan persoluenda ad Duos terminos scilicet medietate ad Penticosten et medietate ad festum sancti Martini sicut predictorum episcoporum autenticis contineri inuenimus Concedimus eciam Abbati et canonicis predicti monasterij et eorum successoribus inperpetuum vt predictam ecclesiam in bonis temporalibus omnimodis in vsus suos proprios pro sue voluntatis Arbitrio conuertant faciendo eidem ecclesie per ydoneum capellanum vel si maluerint per aliquem canonicum de suo collegio deseruiri saluis episcopalibus In huius rei testimonium huic scripto sigillum nostrum apposuimus Datum apud Tybyrmore quarto nonas Augusti Anno dominj Millesimo CC sexagesimo tercio Pontificatus nostri Anno duodecimo hijs testibus Magistro Roberto de streuillyn Decano Dunkeldensis ecclesie Magistro Thoma de Perth officiali nostro Magistro David Belle canonico Dunkeldensi domino Thoma canonico de insula sancti Columbe Willelmo Rectore ecclesie de Mukyrsy et alijs