Charter Document - 06790081
| Charter Number: | 06790081 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1250 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Innocentius Episcopus servus servorum Dei dilectis filijs Abbati de Scona Sancti Andree Dioecesis et Priori Sancti Andree Salutem et apostolicam benedictionem Ex parte dilectorum filiorum Abbatis et Conventus de Insula Missarum Ordinis Sancti Augustini Dumblanensis dioecesis fuit propositum coram nobis quod venerabilis frater noster Dumblanensis Episcopus olim dari optinuit venerabilibus fratribus nostris Glasguensi et Dunkeldensi Episcopis apostolicis litteris in mandatis ut quartam partem decimarum omnium Ecclesiarum parochialium Dumblanensis dioecesis eidem Dumblanensi Episcopo facerent assignari Cumque idem Dumblanensis Episcopus coram dictis Episcopis quartam decimarum hujusmodi sibi juxta tenorem mandati apostolici peteret assignari dictis Abbate et Conventu eidem Episcopo in hujusmodi petitione obsistentibus tandem utraque pars voluntarie ordinationi dictorum Episcoporum tam super quarta decimarum Ecclesiarum ad monasterium dictorum Abbatis et conventus spectantium quam super taxatione vicariorum quarundam ex ipsis Ecclesijs et ordinatione quarundam aliarum Ecclesiarum eorundem nimis exilium et ad deserviendum facilium juramento hinc inde prestito se submisit Qui demum ordinaverunt quod ijdem Abbas et Conventus viginti marcas pro una dignitate et decem pro una prebenda instituendis de novo in Ecclesia Dumblanensi in certis et competentibus locis singulis annis exolvant per quod a solutione predicte quarte decimarum omnium Ecclesiarum ipsorum esse debent omni tempore liberi et immunes Ceterum quia per ordinationem hujusmodi ipsorum monasterium in solutione hujusmodi pecunie nimium videbatur esse gravatum in recompensationem hujusmodi gravaminis modestam vicariorum in quibusdam Ecclesijs eorundem taxationem et ut in quibusdam alijs Ecclesijs non per vicarios sed per capellanos serviatur idoneos provide statuerunt prout in ipsorum litteris super hijs confectis plenius continetur Nos igitur eorundem Abbatis et Conventus supplicationibus inclinati quod super premissis a prenominatis Glasguensi et Dunkeldensi Episcopis provide factum est et in alterius prejudicium non redundat ratum habentes et gratum id auctoritate apostolica duximus confirmandum Quocirca discretioni vestre per apostolica scripta mandamus quatenus eosdem Abbatem et Conventum contra confirmationis nostre tenorem super hijs non permittatis ab aliquibus indebite molestari Molestatores hujusmodi per censuram Ecclesiasticam appellatione postposita compescendo Datum Lugduni viiij Kalendas Maij Pontificatus nostri anno septimo