Charter Document - 06790080
| Charter Number: | 06790080 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1250 |
| Date type: | Internal, Calendar, Papal |
| Resource Link(s): |
People of Medieval Scotland |
Charter:
Innocentius Episcopus servus servorum Dei Dilectis filijs Abbati et Conventui de Insula Missarum Ordinis Sancti Augustini Dumblanensis Dioecesis Salutem et apostolicam benedictionem Ex parte vestra fuit propositum coram nobis Quod venerabilis frater noster Dumblanensis Episcopus olim dari optinuit venerabilibus fratribus nostris Glasguensi et Dunkeldensi Episcopis Apostolicis literis in mandatis ut quartam partem decimarum omnium Ecclesiarum parochialium Dumblanensis dioecesis eidem Dumblanensi Episcopo facerent assignari cumque idem Dumblanensis Episcopus coram dictis Episcopis quartam decimarum huiusmodi sibi juxta tenorem mandati Apostolici peteret assignari vobis ipsi Episcopo in hujusmodi petitione obsistentibus tandem utraque pars voluntarie ordinationi dictorum Episcoporum tam super quarta decimarum Ecclesiarum ad monasterium vestrum spectantium quam super taxatione vicariarum quarumdam ex ipsis Ecclesiis et ordinatione quarumdam aliarum Ecclesiarum suarum nimis exilium et ad deserviendum facilium juramento hinc inde prestito se submisit qui demum ordinaverunt quod vos viginti marcas pro una dignitate et decem pro una prebenda instituendis de novo in Ecclesia Dumblanensi in certis et competentibus locis annis singulis exsolvatis per quod a solutione predicte quarte decimarum omnium Ecclesiarum vestrarum esse debetis omni tempore liberi et immunes Ceterum quia per ordinationem hujusmodi monasterium vestrum in solutione hujusmodi pecunie nimium videbatur esse gravatum in recompensationem hujusmodi gravaminis modestam vicariorum in quibusdam Ecclesijs vestris taxationem et ut in quibusdam alijs ecclesijs non per vicarios sed per capellanos serviatur idoneos provide statuerunt prout in ipsorum literis super hijs confectis plenius continetur Nos igitur vestris supplicationibus inclinati quod super premissis a prenominatis Glasguensi et Dunkeldensi Episcopis provide factum est et in alterius prejudicium non redundat ratum habentes et gratum id auctoritate apostolica confirmamus et presentis scripti patrocinio communimus Nulli ergo omnino hominum liceat hanc paginam nostre confirmationis infringere vel ei ausu temerario contraire Si quis autem hoc attemptare presumpserit indignationem omnipotentis Dei et beatorum Petri et Pauli Apostolorum ejus se noverit incursurum Datum Lugduni viiij Kalendas Maij Pontificatus nostri anno septimo