Charter Document - 06790066
| Charter Number: | 06790066 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1239 |
| Date type: | Internal, A.D., Calendar |
| Resource Link(s): |
People of Medieval Scotland |
Charter:
Omnibus cristi fidelibus hoc scriptum uisuris uel audituris Adam de Prebenda Decanus Dunkeldensis et eiusdem Ecclesie Capitulum eternam in cristo salutem Noueritis nos plenius inspectis instrumentis venerabilium Patrum Iohannis primi Ricardi Iohannis secundi Hugonis Gilberti et Galfridi Episcoporum Dunkeldensium super donacionibus concessionibus confirmacionibus suis factis pauperi Monasterio de Incheaffrane quod Insula Missarum dicitur super Ecclesia de Maderdine et super terra que Abthain de Maderdin dicitur et super quieta clamacione de chan et de Cuneueth que Clerici Dunkeldenses antiquitus percipere consueuerunt de eadem Abthayn mere caritatis intuitu unanimo assensu predictas donaciones concessiones confirmaciones et quietam clamacionem concessisse et hac carta nostra confirmasse sicut in memoratis autenticis plenius repperimus contineri videlicet ut Ecclesiam de Maderdin in bonis temporalibus omnimodis pro sue uoluntatis arbitrio in usus suos proprios conuertant faciendo eidem Ecclesie per idoneum Capellanum uel si maluerint per aliquem sue congregacionis canonicum deseruiri saluis episcopalibus Et predictam Abthayn cum omnibus iustis pertinenciis suis teneant et possideant Reddendo inde annuatim domino Episcopo Dunkeldensi qui fuerit pro tempore pro omni exaccione consuetudine et seruicio seculari ad ipsum pertinente vnam tantummodo Marcam argenti Medietatem scilicet ad Penthecosten et medietatem ad festum sancti Martini Quietum eciam clamauimus et remisimus in perpetuum Abbati et canonicis prefati Monasterii Canum et Conuentum que Clerici Dunkeldenses antiquitus solebant percipere de predicta Abthayn et totum Ius et totum clamum quod nos uel successores nostros contingere possit de eadem Recipientes eos in perpetuam fraternitatem et Ecclesie nostre beneficiorum spiritualium participium salua nobis et successoribus nostris vna libra Incensi ad Pentecosten annuatim ab eis persoluenda nomine fraternitatis gratis concessa In huius rei testimonium Commune sigillum Capituli Ecclesie nostre huic scripto apposuimus Teste Capitulo Datum apud Dunkeldene anno gracie MCCXXX octauo quarto Nonas Ianuarij