Charter Document - 06790064
| Charter Number: | 06790064 |
|---|---|
| Cartulary Title: | Charters, Bulls and other Documents Relating to the Abbey of Inchaffray |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1238 - 1239 |
| Date type: | Assigned |
| Resource Link(s): |
People of Medieval Scotland |
Charter:
Cum mota esset controuersia inter abbatem et conuentum de Insula Missarum petentes ex una parte et magistrum et fratres hospitalis sanctorum Iacobi et Iohannis de Brackeley tenentes ex altera super decimis et omnibus rebus aliis quas dicti petitores sibi uendicabant de terra que dicitur Petneweue ratione ecclesie de Gasccristi et quas dicti tenentes possidebant ratione ecclesie sue de Nesgasc Tandem ita conuenit inter partes quod dicti petentes remiserunt et quiete clamauerunt pro se suis que successoribus predictis tenentibus eorum que successoribus in perpetuum totum ius et totum clamum quod ipsi uel antecessores sui uel successores habent uel habuerunt uel habere poterunt in futuro in omnibus rebus quas ecclesia de Nesgasc tempore huius compositionis possidebat super quibus videlicet inter ecclesiam de Gasccristi ratione ipsius ecclesie et ecclesiam de Nesgasc posset aliquo tempore causa uentilari Prefati uero tenentes pro bono pacis perpetue obligauerunt se et successores suos predictis petentibus eorum que successoribus in perpetuum ad solutionem unius marce esterlingorum annuatim faciendam de decimis supradicte Petneweue ad festum sancti Martini in hyeme apud Nesgasc ipsis petentibus uel eorum certo assignato Et ut hec conuentio et pacis reformatio firmiter et inuiolabiliter obseruetur spontanea uoluntate utriusque partis statutum est ut si altera pars ab hac conuentione et pacis reformatione temptauerit resilire parti aduerse viginti marcas esterlingorum ratione pene persoluat Ad maiorem etiam securitatem utraque pars iurisdictioni domini episcopi Dunblanensis qui fuerit pro tempore se subiecit ut ipse plenarium habeat potestatem omni occasione cauillatione appellatione priuilegio ecclesiastico uel ciuili competenti uel competitura remotis constringere et compellere per censuram ecclesiasticam partem resilientem ad prefatam penam alteri parti persoluendam et nihilominus ad predictam formam pacis obseruandam In huius rei testimonium et securitatem una pars huius cyrographi penes dictum monasterium de Insula missarum deposita est communi sigillo fratrum predictorum de Brackeley signata altera uero pars penes predictum hospitale de Brackeley communi sigillo dicti monasterii de insula missarum communita Hiis Testibus Domino Rogero de Quinci comite Wintonie constabulario scocie Magistro dauid de Bernam domini regis camerario Dominis Thoma de Alneto Seero de sancti Andree Willelmo de Haya Henrico biset Duncano sibaud militibus Morino de kindeloch senescallo comitis Magistro Hugone persona de lochres Simone de Noysi persona de Ormestun Eustagio capellano Magistro Thoma de Man et multis aliis Datum anno gratie Millesimo Ducentesimo tricesimo Octauo