Charter Document - 06790009

In nomine domini nostri Ihesu cristi qui coequalis et coeternus est deo patri et spiritui sancto Ego Gilbertus filius ferthead dei indulgentia Comes de Stradern et Ego Matildis filia Willelmi de aubengni comitissa inspirante gratia diuina volentes in feodo nostro et patrimonio ecclesiam dei exaltare et ad dei cultum sancte religionis ibidem plantaria inserere assentientibus deuotioni nostre Uenerabilibus episcopis nostris Iohanne dunkeldensi et Ionatha dunblainensi liberisque nostris militibus et theinis concedentibus damus Concedimus et tradimus Inche Affren quod latine dicitur Insulam Missarum Domino nostro Ihesu cristo et beate Marie genitrici eius Sanctoque Iohanni Apostolo liberam solutam et quietam ab omni exactione seruitio consuetudine et subiectione seculari ea voluntate et intentione qua aliquis locus in toto regno scottorum liberius solutius quietius et honorificentius diuino cultui et sancte religioni deputatur Eamque cum omnibus possessionibus quas hactenus ei per nos siue per alios fideles diuina largitas contulit uel amodo collatura est Custodie et dispensationi Domni Malisij presbiteri et heremite committimus de ipsius discretione et religione plurimum confidentes Unde uolumus ut idem Malisius libera utatur facultate quoscumque uoluerit secum aggregandi et eos secundum regulam sancti augustini eo quem potius statuerit modo ad dei seruitium informandi Post decessum uero illius ex parte dei prohibemus ne aliquis omnino per cupiditatem congregationi illius loci se preponat nisi quem fratrum concors electio per assensum nostrum sibi preposuerit Nec aliquis siue episcopus sit siue heres noster presumat inibi aliquem contra meram fratrum uoluntatem intrudere Locum enim eundem ita dilectum habemus quod in eo nobis et successoribus nostris sepulturam elegimus et iam primogenitum nostrum ibidem sepeliuimus Deo igitur et sancte Marie perpetue uirgini et sancto Iohanni apostolo eiusdem procuratori et prefato Malisio et omnibus in predicta Insula deo seruientibus et seruituris Ecclesias et possessiones subscriptas Damus Concedimus et presentis scripti munimine per impressionem sigilli nostri confirmamus Ecclesiam Sancti kattani de Aberruotheuen Ecclesiam Sancti Ethernani de Madernin Ecclesiam Sancti Patricii de Strufkeath Ecclesiam Sancti Mechesseoc de Eohterardeuar Ecclesiam sancti Beani de kinkelle Decimam omnium Canorum nostrorum et Redituum nostrorum In frumento farina brasio grano Caseis et omnibus cibariis que annuatim expenduntur in curia nostra et decimam totius piscis qui ad Coquinam nostram defertur et decimam uenationis nostre et decimam omnium lucrorum que proueniunt de placitis nostris et ceteris obuentionibus omnimodis Licentiam quoque piscandi in Pefferin ubicumque uoluerint et capiendi in nemoribus nostris ubi sibi magis oportunum fuerit materiem ad edificationem domorum suarum et utensilium et ad pastum ignis Et tres acras terre illius que proxima est insule uersus aquilonem quas dedimus ad dedicationem capelle ipsius Hec igitur omnia cum omnibus ad ea pertinentibus uolumus ut prefatus Malisius et uniuersi cum eo uel post eum in prefata insula deo seruientes et seruituri in pace dei et domini Regis et nostra teneant et possideant de nobis et heredibus nostris in puram et perpetuam elemosinam pro salute nostra et liberorum nostrorum et omnium amicorum nostrorum et pro animabus omnium antecessorum nostrorum et precipue pro anima Gillecrist primogeniti nostri ibidem quiescentis ita libere quiete plenaria et honorifice sicut aliqua domus religionis in toto Regno scottorum suas possessiones liberius quietius plenarium et honorificentius tenet et possidet Omnibus uero nostris ex parte dei et nostra firmiter prohibemus ne quisquam eorum eidem loco uel eius ministris siue etiam pro pace querenda ad eum confugientibus aliquid molestie uel iniurie inferat super nostram plenarium foris facturam Quicumque uero amicorum uel fidelium hominum nostrorum eidem loco aliqua de suis facultatibus caritatiue contulerit conferat ei dominus bona in terra uiuentium facta est hec confirmatio anno ab incarnatione domini MCC Indictione iij Anno Regni Regis Willelmi xxxv Ab obitu prenominati filij nostri Gillecrist anno secundo Obijt autem iij nonas octobris Huius autem donationis et confirmationis sunt testes hij Rogerius episcopus sancti andree Iohannes episcopus Dunkeldensis Ionathas episcopus Dunblainensis Henricus abbas de Aberbrothok Reimbaldus abbas de Scon Robertus abbas de Dunfermlin Robertus de Quinci Seierus de Quinci Malisius frater comitis Willelmus ferthead et Robertus filij comitis Gillenief dapifer Malisius filius eius Constantinus Iudex Dunecanus filius Malisij Anecol theinus de Dunin Gillecrist gall Nigellus de Dolpatric Tristrannus Constantinus pincerna Henricus Rennarius