Charter Document - 06780014

Honorius Episcopus servus servorum Dei dilectis filiis Conventui Monasterii Wigornie salutem et Apostolicam benedictionem Justis petentium desideriis dignum est nos facilem prebere consensum et vota que a rationis tramite non discordant effectu prosequente complere Ea propter dilecti in Domino filii vestris justis precibus inclinati compositionem inter vos ex una parte et venerabilem fratrem nostrum Wigornensem Episcopum ex altera super institutione ac destitutione Prioris in monasterio vestro pro tempore faciendis ac super custodia prioratus ipso prioratu vacante necnon super proventibus tumbe ac feretrorum Sancti Wlstani et aliis quibusdam articulis mediantibus venerabilibus fratribus nostris scilicet Cantuariensi Archiepiscopo Sancte Romane ecclesie cardinali et Lincolnensi et Bathonensi Episcopis et de Evesham et de Rading Abbatibus et Magistro Stephano de Eketun clerico amicabiliter initam sicut sine pravitate perinde facta est et sponte ab utraque parte recepta et juramento firmata et hactenus pacifice observata ac in litteris inde confectis plenius continetur auctoritate Apostolica confirmavimus Nulli ergo hominum liceat hanc paginam nostre confirmationis infringere vel ei ausu temerario contraire Si quis attemptare presumpserit indignationem omnipotentis Dei et beatorum Petri et Pauli Apostolorum ejus se noverit incursurum Datum Tibur iij Nonis Maii Pontificatus nostri Anno ix