Charter Document - 06770018
| Charter Number: | 06770018 |
|---|---|
| Cartulary Title: | Registrum Cartarum Conventus de Holne |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1298 |
| Date type: | Internal, Calendar, Papal |
| Resource Link(s): |
|
Charter:
Bonefacius episcopus servus servorum Dei dilectis filiis priori et fratribus de Holne ordinis Beata Marie de Monte Carmeli Dunelmensis dioecesis salutem et apostolicam benedictionem Cum a nobis petitur quod justum est et honestum tam vigor equitatis quam ordo exigit rationis ut id per sollicitudinem officii nostri ad debitum perducatur effectum sane vestra petitio nobis exhibita continebat quod nobiles viri Willielmus et Johannes ac Willielmus domini de Vescy Dunelmensis dioecesis cupientes terrena pro celestibus et transitoria pro eternis salubriter commutare quendam locum situm in nemore de Alnwyk ejusdem dioecesis tunc ad ipsos pleno jure spectantem pro oratorio domibus officinis et aliis vobis necessariis prout vobis ex indulto sedis apostolice competebat et competit edificandis ibidem vobis contulerunt intuitu pietatis prout in patentibus litteris inde confectis dictorum nobilium sigillis munitis plenius dicitur contineri Nos itaque vestris supplicationibus inclinati quod super his pie ac provide factum est ratum et gratum habentes id auctoritate apostolica confirmamus et prasentis scripti patrocinio communimus Nulli ergo omnino hominum liceat hanc paginam nostre confirmationis infringere vel ei ausu temerario contraire Si quis autem hoc attemptare presumpserit indignationem Omnipotentis Dei et Beatorum Petri et Pauli Apostolorum ejus se noverit incursurum Data Roma apud Sanctum Petrum quinto idus Junii pontificatus nostri anno quarto