Charter Document - 06761189

In Dei nomine Amen Ut in ecclesia Herefordensi cultus divinus continuetur augmentetur et in ea fervencius laudetur Deus et honoretur ad prefati decani et capituli et successorum suorum perpetuam pacem dicimus laudamus ordinamus et pronunciamus in hiis scriptis quod ecclesia de Duddelbury cum omnibus pertinenciis juribus et libertatibus suis dictis decano et capitulo remaneat libera et quieta ab omni impetracione exaccione seu calumpnia mota vel in posterum movenda per dictum abbatem et conventum Salopie et successorum suorum inperpetuum Et ad majorem securitatem dictis decano et capitulo parandam ordinamus et pronunciamus quod dictus abbas et ejus conventus infra decem dies a presenti die computandos prefatis decano et capitulo cartam sigillis suis communitam faciant quiete clamacionis super jure patronatus et aliis juribus et libertatibus predicte ecclesie sicut est superius annotatum quam quitanciam in curia domini regis recognoscant et cyrograffari faciant necnon omnimodam securitatem per consilium dictorum decani et capituli providendam faciant citra festum omnium sanctorum proximo venturum sub pena ducentarum librarum argenti a parte non parente nobis solvendarum ut eas juxta nostram ordinacionem pauperibus erogemus Ad hec attendentes oppressiones varias et lapsus facultatum quibus ecclesia beati Petri opprimitur pro quibus diminucio divini cultus et hospitalitatis et elemosinarum largicio diminui vel subtrahi verisimiliter timeatur evidenti necessitate et utilitate instante moti pietate volumus et affectamus quatinus in nobis est periculis occurrere memoratis Volumus igitur ordinamus et pronunciamus in hiis scriptis quod ecclesia de Stottesdone quam propter expressas causas prefatis abbati et conventui Salopie appropriamus eis cedat in proprios usus inperpetuum possidenda salva competenti et sufficienti porcione vicarie per nos taxanda et ordinanda ad quam dictus abbas nobis et successoribus nostris cum vacaverit presentabit salvis nobis et successoribus nostris in eadem ecclesia lege jurisdiccione dioecesana et omnibus aliis juribus episcopalibus que ad nos archidiaconos nostros et alios ordinarios quoscumque debebunt vel poterunt aliqualiter de jure vel consuetudine pertinere cujus ecclesie possessionem ingrediantur de nostra licencia predicti religiosi cedente vel decedente rectore qui nunc incumbit possessioni ecclesie de Stottesdone predicte Ceterum quia ex hujus appropriacione casibus contingentibus posset diminui seu ledi jus episcopale volumus ordinamus et pronunciamus in hiis scriptis jus illud ex parte alia relevantes quod jus patronatus duarum porcionum in ecclesia de castro Holegod una cum jure patronatus ecclesie de Tuggeford necnon et pensiones dictis religiosis debite in predictis porcionibus et ecclesia de Tuggeford supradicta episcopo Herefordensi qui pro tempore fuerit amodo approprientur ut de dictis pensionibus porcionibus et ecclesia de Tuggeford memorata liceat episcopo Herefordensi qui pro tempore fuerit ordinare disponere conferre et quodlibet aliud facere secundum sue libitum voluntatis Super quo ad majorem securitatem dicto episcopo et successoribus suis parandam volumus et ordinamus ut prius quod dicti religiosi cartam hujus concessionis et quiete clamacionis sigillis suis munitam infra decem dies a presenti die computandos predicto episcopo faciant liberent et tradant sine more dispendio longioris Et hanc quietanciam in curia domini regis similiter recognoscant et cyrograffari faciant et omnem securitatem per episcopum et suum consilium providendam citra festum omnium sanctorum superius expressum faciant ad plenum sub pena qua prius Ad hec non intendimus per hanc nostram ordinacionem eis aliquid novi juris quo ad decimas percipiendas in parochia de Tuggeforde attribuere nec eis de jure antiquo si quod habent in hujusmodi percepcione in aliquo derogare sed pensiones omnes dictis religiosis in dictis porcionibus et ecclesia de Tuggeforde antiquitus debitas ad episcopum Herefordensem et suos successores pronunciamus amodo pertinere debere Et ad perpetuam hujus nostre ordinacionis memoriam volumus et ordinamus eam triplicari debere cujus una pars signata sigillo nostro et sigillis dictorum abbatis et conventus Salopie remaneat penes dictos decanum et capitulum Herefordenses secunda pars sigillo nostro et sigillo capituli Herefordensis signata remaneat penes dictos abbatem et conventum Salopie tercia pars tam sigillo capituli Herefordensis quam sigillis dictorum abbatis et conventus Salopie signata remaneat penes episcopum Herefordensem memoratum