Charter Document - 06761154

Alexander episcopus servus servorum Dei venerabili fratri episcopo Wigorniensi salutem [] Monstrarunt nobis dilecti filii prior provincialis et fratres ordinis predicatorum in Anglie quod cum olim ipsi extra muros civitatis Herefordensis ecclesiam sive oratorium et alias officinas suis usibus oportuna construere incepissent ut divinis inibi possent vacare laudibus et animarum salutem juxta graciam eis a Domino traditam pro viribus procurare venerabilis frater noster episcopus Herefordensis et dilecti filii capitulum Herefordense eis super hoc sue contradiccionis obstaculum opponentes et non permittentes eosdem ecclesiam vel oratorium et officinas edificare predictas domos quasdam quas dicti prior et fratres jam ibidem construxerant per se vel per alios destruere totaliter presumpserunt ac postmodum a felicis recordacionis Innocencio papa predecessore nostro litteras impetrarunt quod prefati prior et fratres in civitate predicta seu extra muros ipsius ecclesiam seu officinas aliquas construere nullatenus attemptarent et si secus facerent excommunicacionis sentenciam incurrerent ipso facto certo super hac ut dicitur eisdem episcopo et capitulo ab eodem predecessore nostro executore concesso propter quod opus hujusmodi extitit interruptum Quare dicti prior et fratres a nobis petierunt sibi super hoc per sedem apostolicam provideri Cum igitur deceat nos ex injuncto nobis apostolatus officio in hiis per que divini cultus nominis procuratur augmentum inveniri favorabiles et benignos predictos episcopum et capitulum rogandos monendos attente duximus et hortandos nostris eis dantes litteris firmiter in preceptis ut predicti predecessoris nostri litteris nequaquam obstantibus sub quacumque forma verborum conceptis eosdem priorem et fratres quominus ecclesiam et officinas hujusmodi extra muros civitatis predicte ubi eas jam inceperant vel alibi intra civitatem eandem edificare libere valeant per se vel per alios impedire nullatenus presumant Quocirca fraternitati tue per apostolica scripta mandamus quatinus si prefati episcopus et capitulum preceptum nostrum neglexerint adimplere tu eos ab impedimentis hujusmodi desistere monicione premissa auctoritate nostra per te vel per alium appellacione remota compellas invocato ad hoc si opus fuerit brachii secularis auxilio non obstante si eis communiter vel divisim a sede apostolica sit indultum quod interdici suspendi excommunicari seu extra vel ultra certa loca conveniri non possint per litteras sedis ejusdem non facientes plenam et expressam de indulta hujusmodi mencionem et constitucione de duabus dictis edita in concilio generali Nos sentencias si quas in dictos priorem et fratres seu socium eorum seu quoscumque alios [] hujusmodi per predictos [] vel alium fieri contigerit decernimus esse nullas Datum Anagnie x kalendas Februarii pontificatus nostri anno sexto