Charter Document - 06761086

S[tephanus] Dei gracia Cantuariensis archiepiscopus totius Anglie primas et sancte Romane ecclesie cardinalis dilectis sibi filiis de Eveshamia et de Teokesbiria abbatibus salutem et benediccionem Ob causam que vertitur inter venerabilem fratrem Herefordensem episcopum et nobilem virum comitem Pembrok nuper procuratoribus ipsorum coram nobis comparentibus cum aliquamdiu altercatum fuisset a quo et in qua forma sentencie excommunicacionis et interdicti late in homines et terras comitis memorati relaxari debeant tandem ita duximus providendum ut videlicet ab eodem episcopo in forma que subscribitur relaxetur Unde eidem episcopo dedimus in mandatis ut personaliter accedat vel aliquos de suis mittat ad castrum Godrici et ad villas alias suppositas interdicto recepta juratoria caucione ab hominibus villarum illarum excommunicatis vel interdictis item eciam a comite memorato quod parebunt mandatis ecclesie non quod ipse comes ad hec in propria persona juret sed aliquis in animam ipsius ad hec ab eo specialiter constitutus dictas sentencias relaxaret et hec infra octo dies a recepcione presencium jussimus expediri Si qui tamen sint inter homines prefatos qui in perjurium inciderint eo quod in consimilibus alias jurati mandatis ecclesie non paruerint aliam ab eis caucionem quam magis viderit idoneam exigat Hinc est quod devocioni vestre mandamus quatinus si per dictum episcopum steterit quominus premissa infra terminum memoratum fuerint expedita vos sentencias illas auctoritate nostra in forma premissa relaxetis Datum Sudmalling in vigilia exaltacionis sancte crucis