Charter Document - 06760223

Johannes episcopus servus servorum Dei dilectis filiis decano et capitulo ecclesie Herefordensis salutem [] Personas vestras devocionis vestre meritis exigentibus paterna benivolencia prosequentes peticionibus vestris libenter annuimus easque quantum cum Deo possumus favorabiliter exaudimus Exhibita siquidem nobis vestra peticio continebat quod vos olim fabricam ecclesie Herefordensis instaurare volentes supra fundamentum antiquum quod judicio cementariorum seu architectorum qui in arte sua reputabantur periti firmum et solidum putabatur multa ad decorem domus Dei superedificari fecistis opere sumptuoso in quorum construccione viginti millia marcarum sterlingorum et amplius consumpsistis et quia propter debilitatem fundamenti predicti quod superedificatum est tantam nunc minatur ruinam quod judicio simili aliud remedium adhiberi non poterit nisi ut predicte ecclesie fabrica a fundamento totaliter innovetur propter que et expensas eciam factas per vos in prosecucione canonizacionis bone memorie Thome de Cantilupo episcopi Herefordensis variis premi minii oneribus debitorum Nos paterno vobis super hiis compacientes affectu ac volentes propterea vobis de alicujus subvencionis subsidio providere parochialem ecclesiam de Scheningfeld in qua jus patronatus proponitis vos habere cujusque redditus viginti librarum sterlingorum secundum taxacionem decime valorem annuum non excedunt cum capella de Swallefeld dependente ab ea Saresburiensis dioecesis aliisque juribus ac pertinenciis suis vobis et ecclesie vestre in usus fabrice ejusdem ecclesie Herefordensis fabrica ipsa durante postmodum vero pro aliis ejusdem ecclesie necessitatibus facilius supportandis dummodo ut asseritis jus patronatus habeatis in ea in usus proprios apostolica auctoritate concedimus ac eciam deputamus ita quod cedente vel decedente ecclesie predicte rectore liceat vobis corporalem possessionem ipsius ecclesie recipere cujusquam assensu minime requisito eamque in dictos usus premisso ordine retinere reservata tamen de fructibus ipsis per loci dioecesanum perpetuo vicario in dicta ecclesia servituro congrua porcione ex qua valeat congrue sustentari et incumbencia sibi onera supportare non obstante si aliqui super provisionibus sibi faciendis de hujusmodi ecclesiis in dicta dioecesi specialiter vel de beneficiis ecclesiasticis in illis partibus generales apostolice sedis vel legatorum ejus literas impetrarint eciam si per eas ad inhibicionem reservacionem et decretum vel alias quomodo libet sit processum quibus omnibus quod ad assecucionem aliarum ecclesiarum et beneficiorum nolumus prejudicium generari seu si venerabili fratri nostro episcopo Saresbiriensi vel quibuscumque aliis communiter vel divisim ab eadem sit sede indultum quod ad recepcionem vel provisionem alicujus minime teneantur et ad id compelli seu quod interdici suspendi vel excommunicari non possint quodque de hujusmodi ecclesiis aliisque beneficiis ad eorum provisionem vel quamvis aliam disposicionem spectantibus nulli valeat provideri per litteras apostolicas non facientes plenam et expressam et de verbo ad verbum de indulto hujusmodi mencionem et qualibet alia predicte sedis indulgencia cujuscumque tenoris existat per quam presentibus non expressam vel totaliter non insertam effectus presencium impediri valeat quomodolibet vel differri et de qua cujusque toto tenore debeat in nostris litteris fieri mencio specialis Nulli ergo hominum liceat [] Si quis autem [] Datum Avinione vij kalendas Februarii pontificatus nostri anno quarto