Charter Document - 06760198
| Charter Number: | 06760198 |
|---|---|
| Cartulary Title: | Charters and Records of Hereford Cathedral |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1290 |
| Date type: | Internal, Calendar, Papal |
| Resource Link(s): |
|
Charter:
Nicholaus episcopus servus servorum Dei venerabili fratri episcopo Herefordensi salutem [] Significavit nobis dilectus filius Johannes de Aquablanca decanus ecclesie Herefordensis capellanus noster executor testamenti quondam Eymerici cancellarii prefate ecclesie quod nonnulli iniquitatis filii quos prorsus ignorat diversas pecuniarum summas possessiones et quedam alia bona que dictus cancellarius ad se racione persone sue spectantes per manus ipsius executoris in pios usus erogari precepit temere occultant ac occulte detinere presumunt in suarum periculum animarum propter quod ipsius testamenti execucio impeditur Quare dictus executor nobis humiliter supplicavit ut providere sibi super hoc paterna diligencia curaremus Quocirca fraternitati tue per apostolica scripta mandamus quatinus hujusmodi omnes occultos diremptores pecuniarum et aliorum predictorum bonorum publice in ecclesiis coram populo per te vel per alium moneatis ut infra competentem terminum quem illis ad hoc prefixeris ea predicto executori a se debita manifestent ac ei plenam et debitam de premissis satisfaccionem impendant Alioquin ex tunc in eos si infra alium terminum peremptorium competentem quem eis de hoc duxeris prefigendum monitis tuis parere contempserint generalem excommunicacionis sentenciam proferas faciens eam ubi et quando expedire videris usque ad satisfaccionem condignam solemniter publicari Datum apud Urbemveterem idibus Decembris pontificatus nostri anno tercio