Charter Document - 06760196
| Charter Number: | 06760196 |
|---|---|
| Cartulary Title: | Charters and Records of Hereford Cathedral |
| Charter Language: | Latin |
| Charter Origin: | Religious |
| Charter Type(s): | Submission |
| Date: | 1291 |
| Date type: | Internal, A.D., Calendar |
| Resource Link(s): |
|
Charter:
In nomine Domini Amen Anno Domini millesimo ducentesimo nonagesimo indiccione quarta die lune octavo mensis Januarii in presencia mei notarii et testium subscriptorum ad hoc specialiter vocatorum et rogatorem comparuit dominus Poncius de Cors coram venerabili patre domino Ricardo Dei gracia Herefordensi episcopo pro tribunali sedente et cum publice recitaret sibi ex parte dicti patris impositum extitisse quod prebendam de Hinitone in ecclesia Herefordensi per intrusionem auctoritate propria sit ingressus sic eam contra justiciam occupando submisit se publice et solempniter gracie ordinacioni et voluntati patris ejusdem super dicta prebenda et omnibus eam contingentibus et omnibus aliis injuriis dicto patri et suis per eundem et suos illatis et omni juri et possessioni que sibi ad eam seu in ea possent competere quoquo modo prefatam prebendam jus et possessionem que in eadem asseruit se habere in manibus patris predicti nihilominus resignando pure sponte simpliciter et absolute In quarum submissionis et resignacionis evidenciam pleniorem dictus dominus Poncius chyrothecam suam tradidit dicto patri qui eam recipiens submissionem et resignacionem hujusmodi acceptavit et admisit devictus instancia venerabilium virorum magistrorum Rogeri de Savenake canonici Herefordensis Ricardi de Herefordie archidiaconi Herefordie et aliorum qui eidem patri tunc temporis adsidebant Renunciavit eciam omnibus impetratis et eciam impetrandis omnibusque processibus ex parte sua et pro ipso ubicumque habitis in hac parte promittens bona fide sacramento super hiis prestito corporali se impetrata et processus hujusmodi redditurum patri predicto cum super hoc ex parte sua fuerit requisitus et ordinacionem ipsius in omnibus servaturum quam super premissis et eorum quolibet duxerit faciendam Acta sunt hec apud Sugwas in aula dicti patris die anno et indiccione predictis presentibus domino Waltero de Rodmerleghe canonico Herefordie magistris Willelmo de Kingescote tunc officiali Herefordie Ricardo de Merlawe fratre Johanne Rous canonico de Wormeleye dominis Johanne de Kemeseye Willelmo de Merthone capellanis patris predicti et aliis quam pluribus de familia dicti patris