Charter Document - 06760195

In nomine Patris et Filii et Spiritus sancti Amen Cum inter venerabiles viros decanum et capitulum Herefordenses ex parte una et religiosos viros abbatem et conventum de Lyra ex altera super quibusdam decimis in Lyra Acle Herefordensis dioecesis necnon super quadam annua pensione quadraginta solidorum exorta fuisset materia questionis pro eo quod dicti religiosi decimas illas per quindecim annos et amplius ex quadam permutacione cum predicta pensione inter dictas partes dudum facta prout in quodam instrumento super hoc confecto vidimus contineri que quidem pensio per idem tempus dictis decano et capitulo minime fuerat persoluta post varias altercaciones dicte partes per procuratores legitime constitutos coram nobis Ricardo Dei gracia Herefordensi episcopo in ecclesia parochiali de Bosebury sexto die Augusti anno Domini MCC octogesimo sexto tempore messium de consensu parcium non obstante voluntate spontanea consenserunt quod prefate decime dictis dominis abbati et conventui de Lyra virtute permutacionis predicte libere remaneant integre et pacifice ut solebant ita quod de cetero omni anno in festo sancti Michaelis de camera dicti domini abbatis Lyrensis apud Herefordiam dicta pensio quadraginta solidorum dictis dominis decano et capitulo exsolvatur plenaria sine more dispendio longioris donec dicta pensio a possessore ecclesie de Synninghefeld Sarisburiensis dioecesis sumptibus dictorum religiosorum justo titulo et pleno jure recuperetur ut eadem sic recuperata dictis decano et capitulo restituatur pleno jure et justo titulo in perpetuum possidenda et ex tunc de camera dicti abbatis cesset dicta solucio pensionis Et dicti religiosi prefatas decimas pleno jure et justo titulo perpetuo habeant et possideant in futurum Quam convencionem et concessionem seu solemnem promissionem nos prefatus Ricardus [] approbantes easdem ratificatis et dictas partes ad inviolabilem hinc inde observacionem earundem in Dei nomine condemnamus Et quia memorate partes tam super arreragio pensionis predicte quam dampnis et gravaminibus sibi mutuo illatis nostre ordinacioni dicto seu laudo se totaliter submiserunt prout in litteris submissionis parcium predictarum plenius continetur nos in Dei nomine premissa singula ponderantes ordinamus volumus et laudamus quod prefati religiosi pro arreragiis predictis et dampnis decano et capitulo memoratis solum triginta quinque marcas exsolvant videlicet in festo natalis Domini proximo subsequenti septem decem marcas et dimidiam et in festo sancti Ethelberti sequenti septem decem marcas et dimidiam Totum residuum arreragiorum et dampnorum ad gravamina et dampna dictis religiosis illata apud Lyram Acle compensantes certis de causis eisdem remittimus per presentes omnibus rancoribus hinc inde remissis omnibusque questionibus litibus et querelis in quacumque curia inter partes super hiis actenus suscitatis necnon omnibus processibus habitis in hac parte quas exnunc tenore presencium adnullamus in irritum penitus revocatis Ad quorum omnium observacionem et pacis perpetue stabilitatem ex hac nostra ordinacione utramque partem volumus firmiter obligari et precipimus in hiis scriptis injungentes partibus sepe dictis ut hanc nostram ordinacionem tam sigillo abbatis et conventus de Lyra quam sigillo communi sepefati capituli faciant firmiter roborari Et ne levis occasio iterum ad discordiam in premissis partes inducere valeat in futurum partem contra prefatam ordinacionem venientem sentenciam majoris excommunicacionis pronunciamus incurrere ipso facto volentes ut hujus nostre ordinacionis recitacio loco trine mencionis legitime censeatur Et in testimonium premissorum tria instrumenta ejusdem tenoris inde per modum cyrographi sunt confecta quorum unum penes nos residet non signatum alia vero duo penes partes predictas nostro ac earundem parcium sigillis vicissim resident consignata Datum et actum die loco et anno Domini supradictis et ordinacionis nostre quarto