Charter Document - 06760183

Martinus episcopus servus servorum Dei dilectis filiis abbati de Abendona priori de Pontefracto Sarisburiensis et Eboracensis dioecesium ac archidiacono Colocestrie in ecclesia Londonensi salutem [] Sua nobis venerabilis frater noster episcopus Herefordensis peticione monstravit quod licet metropolitanus locorum in subditos suffraganeorum suorum nullam nisi in casibus in jure determinatis jurisdiccionem habere noscatur tamen venerabilis frater noster archiepiscopus Cantuariensis id nullo de hiis casibus exposcente in magistrum Robertum officialem Herefordensem subditum ipsius episcopi suffraganei archiepiscopi predicti in quem alias jurisdiccionem delegatam vel ordinariam non habebat per magistrum Petrum officialem Cantuariensem et Rogerum decanum ecclesie beate Marie de arcubus Londoniensis motu proprio de facto excommunicacionis fecit sentenciam promulgari in ejusdem episcopi sueque jurisdiccionis prejudicium et gravamen propter quod ex parte ipsius episcopi fuit ad sedem apostolicam appellatum Quocirca discrecioni vestre de utriusque partis procuratorum assensu per apostolica scripta mandamus quatinus vocatis apud Radingiam qui fuerint evocandi et auditis hinc inde propositis quod canonicum fuerit appellacione postposita decernatis facientes quod decreveritis auctoritate nostra firmiter observari Testes autem qui fuerint nominati si se gracia odio vel timore subtraxerint per censuram ecclesiasticam appellacione cessante cogatis veritati testimonium perhibere Quod si non omnes hiis exequendis potueritis interesse duo vestrum ea nihilominus exequamini Datum apud Urbemveterem idibus Februarii pontificatus nostri anno primo