Charter Document - 06760157

Urbanus episcopus servus servorum Dei venerabili fratri episcopo et dilecto filio archidiacono Landavensi salutem [] Sua nobis decanus et capitulum Herefordenses peticione monstrarunt quod cum prior et fratres ordinis predicatorum in Anglie extra muros civitatis Herefordensis absque licencia venerabilis fratris nostri Herefordensis episcopi decani et capituli predictorum quandam ecclesiam et officinas eis necessarias pro habitacione sua construere incepissent iidem decanus et capitulum attendentes quod hoc in eorum prejudicium redundabat novum opus eisdem priori et fratribus denunciarunt qui ab incepto opere spontanee destiterunt et postmodum suggerentes felicis recordacionis Innocencio pape predecessori nostro quod ipsi locum ipsum cui animo non renunciaverant ob reverenciam episcopi decani et capituli predictorum qui hoc moleste ferebant sub illa fiducia reliquerant ut ad eum cum ipsorum gracia et favore redirent ad eos super hoc sub certa forma ipsius predecessoris litteras impetrarunt et postmodum asserentes quod decanus et capitulum predicti preces predecessoris contempnentes ipsius impedierant priorem et fratres eosdem ne in hujusmodi loco edificium erigerent in operarios et alios adjutores eorum excommunicacionis sentenciam promulgando super hoc et quibusdam aliis injuriis eis a dicto decano et capitulo ut dicebant illatis ad archidiaconum et officialem Wigorniensem ac thesaurarium Lichfeldensem ipsius predecessoris impetrarunt litteras continentes ut super hiis de plano et sine strepitu judiciali inquirentes diligencius veritatem causam hujusmodi si de voluntate parcium procederet infra certum terminum per composicionem amicabilem renunciarent Alioquin ipsam ex tunc instructam vel non instructam remitterent ad apostolice sedis examen prefixo certo termino peremptorio quo per se vel per procuratores idoneos apostolico se conspectui presentarent Predicti autem decanus et capitulum ab eisdem judicibus ex eo sencientes indebite se gravari quod ipsi lite non contestata testes predictorum prioris et fratrum super principali contra justiciam admittebant ad sedem appellarunt eandem Dicti vero judices causam ipsam cum disposicionibus dictorum testium et processu coram eis habito ad apostolicum remiserunt examen dictusque predecessor dilectum filium nostrum Ricardum sancti Angeli diaconum cardinalem in causa hujusmodi dedit partibus auditorem Idem vero cardinalis cassato processu predictorum judicum pro eo quod in causa hujusmodi lis non fuerat contestata et propter hoc ad dictam sedem extiterat appellatum ad probandum hujusmodi appellacionem in Anglie fore pronunciavit partem dictorum decani et capituli admittendam sicque ad probandas hujusmodi et quasdam alias appellaciones ab eisdem decano et capitulo interpositas fuit recepcio et examinacio testium quibusdam judicibus per litteras ipsius predecessoris commissa Denique prefatus predecessor cum dictus cardinalis a Romana curia discessisset predictam causam dilecto filio nostro Johannes tituli sancti Laurencii in Lucina presbytero cardinali commisit et demum intellecto quod ex construccione dicti loci poterat dictis decano et capitulo et toti clero Herefordensi civitati et dioecesi prejudicium generari predictis priori et fratribus per suas mandavit litteras ut ab eorundem decani et capituli et cleri molestia et gravamine super hoc decetero conquiescerent certis super hoc monitoribus deputatis propter quod dicti fratres ad tempus cause supersederunt eidem Post hec autem coram dicto Johannes cardinali comparentes procuratores parcium consenserunt quod usque ad certum tempus spe pacis tractande inter partes remaneret causa hujusmodi in suspenso elapso vero hujusmodi tempore coram quondam fratre Rustando capellano predecessoris ipsius ab ipso in predicta causa eisdem partibus auditore concesso fuit super principali lis legitime contestata et postmodum recepcio et examinacio testium in dicta causa certis judicibus ab eodem predecessore commissa Demum vero ad instanciam predictorum prioris et fratrum quibus per felicis recordacionis A[lexandri] pape predecessoris nostri litteras fuerat demandatum ut ab eorundem decani et capituli et cleri molestia et gravamine super hoc conquiescerent ad eosdem episcopum et capitulum dictus Alexander predecessor noster non facientes de predictis processibus ullam mencionem direxit litteras inter alia continentes ne ipsi eosdem priorem et fratres quominus ecclesiam et officinas hujusmodi extra muros civitatis ejusdem ubi eas jam inceperant vel alibi infra civitatem predictam edificare libere possent per se vel alios ullatenus impedirent eisdem priori et fratribus venerabili fratre nostro Wigorniensi episcopo super hoc executore concesso Cumque predictus Wigorniensis episcopus decano et capitulo Herefordensibus mandasset dictos priorem et fratres super construccione ecclesie ac officinarum hujusmodi nullatenus impedirent ex parte ipsorum fuit coram eodem episcopo Wigorniensi excipiendo propositum quod cum apud predictam sedem hujusmodi causa penderet predictus Wigorniensis episcopus per litteras ad eum obtentas in quibus de hoc et de auditoribus in predicta causa datis et processibus habitis coram eis nulla mencio habebatur procedere de jure non poterat nec debebat et quia prefatus Wigorniensis episcopus eos super hoc audire contra justiciam denegavit ipsi sencientes ex hoc indebite se gravari ad nostram audienciam appellarunt Quocirca discrecioni vestre per apostolica scripta mandamus quatinus vocatis qui fuerint evocandi et auditis hinc inde propositis quod justum fuerit appellacione postposita statuatis facientes quod decreveritis per censuram ecclesiasticam firmiter observari Testes autem qui fuerint nominati si se gracia odio vel timore subtraxerint per censuram eandem appellacione cessante cogatis veritati testimonium perhibere Quod si non ambo hiis exequendis poteritis interesse alter vestrum nihilominus exequatur Datum Viterbii xij kalendas Octobris pontificatus nostri anno primo