Charter Document - 06760148
| Charter Number: | 06760148 |
|---|---|
| Cartulary Title: | Charters and Records of Hereford Cathedral |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1255 |
| Date type: | Internal, A.D., Calendar, Papal |
| Resource Link(s): |
|
Charter:
In nomine Domini Amen Anno nativitatis ejusdem millesimo ducentesimo quinquagesimo quinto indiccione xiij mensis Aprilis die xiiij pontificatus domini Alexandri pape iiij anno primo in presencia venerabilis patris domini Octaviani ecclesie Marie in Via Lata diaconi cardinalis apostolice sedis legati necnon et mei Noclecii scriniarii et testium subscriptorum ad hoc specialiter rogatorem et vocatorum Petrus Scotti Dominici Gregorius Bernardinus Jacobus Romei et Rubeus Consilii cives et mercatores Senenses pro se ipsis et Scotto Dominici Loteringo Corradi Rainerio Citadini Jacobo de Balso Bonagro Ardunandi Rainerio domini Orlandi et aliis eorum sociis et concivibus suis vendiderunt de domini pape mandato reverendo domino patri Petro Dei gracia episcopo Herefordensi nuncio et procuratori domini Henrici Dei gracia regis Anglie illustris et filiorum suorum dictorum domini regis et filiorum suorum nomine recipienti illa jocalia que fuerunt Frederici quondam Romani imperatoris et regis Corradi filii sui videlicet quandam coronam de auro bucculas et anulos de auro et res alias cum gemmis et lapidibus preciosis que habuerunt obligata pro ipsorum diversis debitis in quibus dicti dominus Fredericus et rex Conradus ipsis tenebantur pro decem milibus unciis auri sinceri ad pondus regni quas decem mille uncias auri nominati mercatores pro se ipsis et sociis suis predictis confessi sunt et recognoverunt se recepisse et habuisse ab ipso domino episcopo pro predictis domino rege et filiis suis solvente de quibus dicti mercatores se bene quietos et pacatos vocaverunt excepcioni non numerate et non solute sibi pecunie auri non ponderati omnino renunciando et donec prefatus dominus episcopus predicta jocalia ad manus suas habuerit prefati mercatores ipsorum dominorum episcopi et regis ac filiorum suorum memorata jocalia tenere precario nomine recognoverunt Super predictis vero jocalibus quilibet ipsorum promiserunt stare estimacioni quorundam proborum virorum communiter electorum congruencium de ipsis et in civitate Senensi debet fieri predicta estimacio ubi predicta jocalia ipsi domino episcopo dari debent et assignari Si vero dicta jocalia estimabuntur minus valere quam dicte decem mille uncie auri totum illud quod minus estimabuntur tantum promiserunt ipsi domino episcopo apud Senas de aliis bonis eorum restituere et si plus estimabuntur quam sit quantitas predicta prefatus dominus episcopus ipsis mercatoribus reddere et restituere promisit in eodem loco ad voluntatem ipsorum quicquid estimabuntur ultra quantitatem predictam Facta sunt inde duo publica instrumenta quorum unum habuit dictus dominus episcopus alterum habuerunt mercatores predicti In cujus rei [] Factum Neapoli coram hiis testibus scilicet domino Bertholdo de Hoemburch marchione teste Oddone fratre suo domino Roberto de Valentino milite dicti domini regis testibus magistris Rustando et Guillelmo de Fraxino domini regis capellanis