Charter Document - 06760139

In nomine domini nostri Jesu Christi Amen Cum questio esset inter dominum Petrum Herefordensem episcopum ex una parte et decanum et capitulum Herefordenses nomine capituli Herefordensis ipsiusque decanatus ex altera et ipsa causa esset a domino papa priori sancti Johannis decano et sub decano Wellensibus sub certa forma commissa dictus episcopus per procuratorem in presencia dictorum judicum constitutus libellum porrexit contra decanum et capitulum nomine capituli in hunc modum Dicit procurator episcopi Herefordensis contra decanum et capitulum ejusdem loci quod vult uti rescriptis apostolicis pro edicione cum adjeccionibus subscriptis Dicit prefatus episcopus contra predictos decanum et capitulum quod ipsi injuste percipiunt de ecclesia de Lideneia cum suis pertinenciis de firma sive de porcione sexaginta marcas singulis annis asserentes dictam ecclesiam cum suis pertinenciis sibi appropriatam fuisse nec permittunt dictum episcopum de eadem ordinare unde petit quod a tali percepcione desistere compellantur et super hoc quod asserunt prefatam ecclesiam cum suis pertinenciis sibi appropriatam esse petit eisdem sentencialiter perpetuum silencium imponi petit eciam ut eisdem tanquam illicitis detentoribus amotis ab eadem ecclesia libere valeat de eadem ordinare cum sit sita in sua dioecesi Item dicit contra eosdem quod injuste detinent ecclesiam de Madeleya cum suis pertinenciis asserentes sibi appropriatam fuisse nec permittunt episcopum ordinare de eadem unde petit ipsos tanquam illicitos detentores ab eadem sentencialiter amoveri quod de eadem libere valeat ordinare petit eciam quod si qua vice sufficienti possint se tueri quantum ad ecclesiam predictam quod institutis ibidem vicariis convenientem possit assignare porcionem et illis decedentibus possit alios ibidem instituere et in eisdem exercere officium pastorale cum sit loci dioecesanus Item dicit contra eosdem quod cum ecclesia de Baysam vacaret per mortem quondam Walteri de Munemuta qui usque ad diem obitus sui gessit se pro rectore in eadem et pro tali communiter habebatur et qui eisdem reddebat quindecim marcas singulis annis eidem ecclesie impositas contra statuta Lateranensis concilii decanus et capitulum non obstante hoc quod fuit sequestrata per episcopum quo usque discuteretur quod haberent jus in eadem se intruserunt in eadem et per intrusionem ipsam ecclesiam cum suis pertinenciis adhuc detinent occupatam licet auctoritate episcopi esset interdicta nihilominus presumunt ibi divina celebrare nec ipsum permittunt celebrare in eadem asserentes suis propriis usibus appropriatam fuisse unde petit quod pro intrusione in prefatam ecclesiam canonice puniantur et ab eadem quam detinent illicite occupatam penitus amoveantur et quia in prefata ecclesia interdicta divina officia celebrare presumunt digna pena coherceantur petit eciam ut eisdem amotis tanquam illicitis detentoribus eo non obstante quod dicunt dictam ecclesiam sibi appropriatam fuisse ipsum permittant ordinare de eadem Item dicit contra eosdem quod ipsi detinent ecclesias de Wolvinehope de Pionia de Prestona de Nortone de Maurdene de Wihintone de Brahintone de Uptone in quibus sunt vicarii nec habent unde possint sustentari nec permittunt dicti decanus et capitulum quod episcopus assignet eisdem convenientes porciones de proventibus earundem ecclesiarum unde petit quod institutis ibidem vicariis non obstante decani et capituli contradiccione convenientem possit assignare porcionem et illis decedentibus possit ibidem alios instituere et in eisdem exercere officium pastorale cum sint site in sua dioecesi Item dicit contra eosdem quod non permittunt ipsum correccionis reformacionis et visitacionis officium in eosdem exercere unde petit ut eorum contradiccione non obstante officium suum in predictis et aliis episcopalibus libere valeat exercere cum sit loci dioecesanus Item dicit contra eosdem quod ipsi non permittunt quod ipse visitet corrigat et reformet vicarios presbyteros et clericos de choro unde petit ut eorum contradiccione non obstante in predictis officium episcopale libere valeat exercere Petit eciam quod de cetero vicariis de choro decedentibus possit ibidem de aliis ordinare et eisdem decano et capitulo super hoc sentencialiter perpetuum silencium imponere Item dicit contra eosdem quod injuste contra statuta Lateranensis concilii percipiunt quadraginta solidos de hospitali de Ledebury et impediunt quod episcopus non possit ordinare de eodem hospitali maxime cum sit in sua dioecesi et sit fundatum in fundo sibi censuali et in suo feudo unde petit super percepcione xl solidorum predictorum eisdem perpetuum silencium imponi et quod possit de cetero ordinare de eodem hospitali eorum contradiccione not obstante Item dicit contra eosdem quod non permittunt ipsum ordinare de domo elemosinaria sita in civitate Herefordensi quam fundavit Helias de Bristollio tali adjecta condicione quod deberent ibi pasci centum pauperes singulis diebus in perpetuum Unde cum non sit observatum petit quod possit ordinare de eodem hospitali non obstante eorum contradiccione Item dicit contra eosdem quod ipsi percipiunt per se vel per alios de ecclesia de Dudelebury singulis annis injuste quattuordecim marcas et dimidiam in prejudicium episcopi et rectoris ejusdem ecclesie de Dudelebury et ipsius ecclesie contra statuta Lateranensis concilii unde petit eisdem super predicta percepcione sentencialiter perpetuum silencium imponi Item dicit contra eosdem quod ipsorum auctoritate tres capellani beate Caterine injuste percipiunt pensiones in ecclesiis de Foye de Boclentone et Presthemede impositas contra statuta Lateranensis concilii unde petit quod dictis pensionibus penitus relaxatis provideatur dictis capellanis aliunde unde possint commode sustentari Petit eciam quod dictis capellanis decedentibus possit dictus episcopus ibidem alios instituere dictorum decani et capituli contradiccione non obstante Item dicit episcopus contra eosdem quod ipsi molestant et infestant ipsum injuste petendo ab ipso decimas suorum molendinorum et decimas nundinarum sancti Ethelberti unde petit eisdem perpetuum silencium sentencialiter imponi cum immunis esse debeat a tali prestacione Item dicit contra eosdem quod cum ipsi in ecclesia sua iconomum non habeant et propter hoc ipsius ecclesie cause et negocia minus bene tractentur sive procurentur in grave prejudicium ipsius ecclesie petit quod possit ibidem de iconomo legitime ordinare cum ipsi super hoc hucusque extiterint negligentes Item dicit contra eosdem quod ipsi injuste percipiunt obvenciones molendini de Hyane cum ipsum molendinum ab antecessoribus suis datum et assignatum fuerit ad servicium beate virginis in ipsa ecclesia singulis diebus in perpetuum faciendum unde cum ipsi auctoritate propria sibi appropiaverint petit ut possit de dicto molendino et de dicto servicio beate virginis ordinare secundum quod fuit statutum et ordinatum in collacione predicta de dicto molendino Item dicit contra eosdem quod ipsum molestant et infestant petendo ab ipso triginta duas navas de ivernatio et triginta duas navas de avena de maneriis suis singulis annis unde petit ipsos compesci ab ipsa molestacione hec omnia dicit salvo sibi beneficio juris Item contra dictum decanum Herefordensem per se edidit episcopus dictus Herefordensis in hunc modum dicit edendo contra eundem quod non permittit ipsum visitare corrigere reformare rectores vicarios et alios clericos et laicos nec eorum excessus de decanatu Herefordie unde petit quod circa reformacionem morum et correccionem excessuum tam clericorum quam laicorum de dicto decanatu possit episcopale exercere officium libere non obstante ipsius decani contradiccione Item dicit contra decanum quod ipse detinet villam de Hunditone cum suis pertinenciis sive prebendam que dicitur prebenda de Hunditone cum non sit annexa decanatui nec permittit dictum episcopum ordinare de eadem unde petit ipsum amoveri de dicta prebenda tanquam illicitum detentorem et quod possit de eadem canonice ordinare Item dicit contra eundem quod ipse injuste detinet ecclesiam de Clone et de Avenebury sitas in sua dioecesi nec ibi facit residenciam unde petit ipsum dictis ecclesiis amoveri tanquam illicitum detentorem cum sit ipso jure privatus et quod possit ordinare de eisdem ecclesiis libere ipsius contradiccione non obstante Item dicit contra eundem quod non permittit ipsum in prioratu sancti Guthlaci Herefordie instituere priorem nec in aliis ecclesiis de decanatu instituere rectores vicarios et presbyteros cum ipsas ecclesias vacare contingit unde petit quod in dictis monasterio et ecclesiis possit cum ipsas vacare contingit episcopale officium exercere non obstante ipsius contradiccione et eidem super hoc perpetuum silencium imponi Item dicit contra eundem quod ipsum infestat et molestat petendo ab ipso terciam partem decime de suis maneriis contra justiciam unde petit ab ipsa molestacione absolvi et eidem super hoc sentencialiter perpetuum silencium imponi Verum cum dicti judices remisissent ad sedem apostolicam predictas causas prout eis datum fuerat in mandatis dominus papa nos Ricardum sancti Angeli diaconum cardinalem concessit partibus auditorem quibus partibus per procuratores legitimos comparentibus coram nobis et ipso decano personaliter comparente predicti procuratores mandatum habentes transigendi et componendi prout in quibusdam litteris inde confectis plenius continetur iidem procuratores et predictus decanus in nos Ricardum sancti Angeli diaconum cardinalem dominum archidiaconum Cantuariensem et magistrum Hugonem de Mortuomari tanquam in arbitros amicabiles compositores ordinatores seu laudatores compromiserunt super dictis questionibus prout in instrumento publico inde confecto plenius continetur Item fuit in nos compromissum ut superius dictum est super quibusdam decimis molendinorum et nundinarum sancti Ethelberti et super quibusdam travis frumenti et avene quas consueverunt percipere iidem decanus et capitulum de maneriis episcopi et trigenta ladis frumenti percipiendis de granario episcopi et decimis assartorum ad substentacionem capellani ministrantis in ecclesia beate Marie Magdalene quibus decanus et capitulum dicebant se esse spoliatos Item super decimis quas ipse decanus in maneriis episcopi et antecessoris sui a tempore cujus non extat memoria perceperunt quibus decimis decanus dicit se per dictum episcopum spoliatum Nos igitur inter nos deliberacione habita diligenti ordinamus laudamus et componimus ob reverenciam domini episcopi et honorem et utriusque partis utilitatem in hunc modum videlicet quod decanus et capitulum ponant ecclesiam de Baysam libere et absolute in manibus et in voluntate domini episcopi Herefordensis et supponant se misericordie dicti episcopi tam super ecclesia quam super eo quod sequestrum episcopi per se vel per alios inductum ecclesie violasse dicuntur et ordinamus tamen pro bono pacis quod tam pro fructibus quam pro violacione que dicunt esse factam et pro omnibus aliis injuriis si que tam ab eis quam ab aliis hac occasione dicuntur dicti decanus et capitulum dabunt prefato episcopo centum marcas argenti Volumus siquidem et mandamus quod nichil ultra dictas centum marcas occasione violacionis injuriarum si que fuerint et fructuum predictorum vel ex eo quod vicarius episcopi interdicti in ecclesia de Baysam et excommunicacionis sentencias in omnes illos qui sequestrum quod dicebat se fecisse violarent et in dicta ecclesia celebrarent post quasdam appellaciones ad sedem apostolicam interpositas ab eisdem dicitur promulgasse ab episcopo vel alio nomine suo dictis decano et capitulo vel ab alio peti possit vel aliqua molestia irrogari et quia predicta ecclesia per Radulphum quondam episcopum Herefordensem concessa est ad servicium majoris ecclesie ampliandum ita quod canonici qui intersint diurnis horis et majori misse debeant obvenciones ejusdem ecclesie percipere et [] reservata consulimus bona fide episcopo memorato quod restituat et ex se ipso concedat ecclesiam predictam decano et capitulo nominatis ad servicium ad quod dinoscitur esse concessa eisdem ne dicta ecclesia tempore suo tanto et tam pio servicio defraudetur et super hoc in aliis litteris sigillis nostris signatis dicto episcopo nostram plenius exponimus voluntatem et ordinacionem Super aliis vero articulis contentis in dictis libellis ordinando componendo et laudando precipimus et mandamus quod episcopus in omnibus supersedeat et quiescat et dimittat eos in pace sicut fuerunt temporibus preteritis hoc salvo quod in ecclesiis et capellis quas predicti decanus et capitulum ad manus suas tenent ubi non sunt instituti vicarii instituantur eis de bonis ecclesie assignate et congrue porciones ubi vero sunt vicarii instituti et non habent congruam porcionem assignetur eis a decano et capitulo si moniti ab episcopo facere recusarent tunc ab episcopo fiat assignacio supradicta De domo vero elemosynaria sita in civitate Herefordensi ubi centum pauperes de ordinacione fundacionis debent pasci sic ordinamus quod pascantur ibi pauperes prout suppetunt facultates domus ipsius et si decanus et capitulum moniti ab episcopo id non fecerint tunc ad hoc per episcopum compellantur Volumus insuper laudamus et mandamus quod decimas molendinorum nundinarum assartorum et travas tam bladi quam avene et quinque ladas frumenti sicut ante subtraccionem solvi consueverunt in futurum solvat eisdem et de perceptis et retentis ab episcopo arbitrio ipsius et consciencie duximus relinquendum et ad hoc procuratores capituli et decanum nomine suo induximus ut dictum episcopum in suis et ecclesie sue negociis inveniant magis favorabilem et benignum Insuper precipimus quod dicto decano solvat dictas decimas quas ipse et predecessores sui decano et predecessoribus suis solvere consueverunt Inhibicionem autem quam fecit dictus episcopus vel alius ejus nomine abbati Gloucestrie et abbati de Gingemountne et persone de Boclintone et vicario de Dudlebury ne solverent porciones in quibus tenentur quibusdam vicariis deservientibus in ecclesia majori Herefordensi et in capella sancte Caterine quo ad preteritas soluciones et futuras precipimus et volumus revocari In cujus rei testimonium [] Actum Perusii anno Domini millesimo CCLIJ indiccione x mensis Februarii die vicesima secunda presentibus hiis testibus ad hoc rogatis scilicet magistro Andrea de Secia domini pape scriptore domino Mauricio Molael Arnaldo de Fraxino Reginaldo de Romanis et domino Trasimundo canonico Belvacensi