Charter Document - 06760134
| Charter Number: | 06760134 |
|---|---|
| Cartulary Title: | Charters and Records of Hereford Cathedral |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1251 |
| Date type: | Internal, Calendar, Papal |
| Resource Link(s): |
|
Charter:
Innocencius episcopus servus servorum Dei venerabili fratri episcopo Elyensi salutem [] Dilecti filii capitulum Herefordense nobis exponere curaverunt quod venerabilis frater noster Herefordensis episcopus asserens quod ipsi ne idem episcopus eos Herefordensem ac alias ecclesias et clericos decanatus Herefordensis visitare valeat et alia que ad episcopale officium pertinent exercere presumunt ipsum contra justiciam impedire quodque ipsi pensiones de Dudelebere et quibusdam aliis ecclesiis sue dioecesis contra Lateranensis statuta concilii de novo impositas recipere non verentur in ipsius episcopi prejudicium et gravamen ac suggerens insuper quod ipsi de Lideney et quasdam alias ecclesias predicte dioecesis applicitas propriis usibus contra justiciam detinentes ne idem episcopus rectores possit in eisdem ecclesiis instituere indebite impedire presumunt in animarum suarum periculum ejusdem episcopi prejudicium et scandalum plurimorum et quod ipsi super quodam annuo censu et rebus aliis injuriantur eidem diversas a nobis ad dilectos filios priorem sancti Johannis decanum et subdecanum Wellensem ut audiant hujusmodi causas et terminent infra certum temporis spacium vel ex tunc eas ad apostolicam sedem remittant sub consueta forma litteras impetravit et per alias litteras injungi obtinuit judicibus ipsis ut causa que inter ipsos ex parte una et predictum episcopum ex altera super ecclesia de Baissan quam in proprios usus habent coram eis auctoritate apostolica vertitur infra sex menses post recepcionem litterarum nostrarum judicio vel concordia fida parcium voluntate terminaretur alioquin causam ipsam instructam vel non instructam ad apostolicam remittant sedem prefigentes peremptorium terminum competentem quo per procuratores idoneos cum actis instrumentis suis omnibus nostro se conspectui representent facturi et recepturi quod ordo dictaverit racionis Cum igitur dicti decanus et capitulum sicut asserunt acta sua et munimenta causas tangencia propter viarum pericula dubitent ad eodem apostolicam destinare et sibi super hoc petierint veniam fieri nos volentes eisdem consulere in hac parte fraternitati vestre per hec scripta mandamus quatinus denunciacione predicto episcopo vel ejus officiali facta ut quando inspici munimenta contigerit per se vel per alium si velit intersit eadem munimenta diligenter inspicias et de verbo ad verbum nichil minuto addito vel mutato quo rei substancia varietur transcribi facias ac transcripta fideliter nobis facta sub tuo sigillo studeas destinare Datum Lugduni v nonas Marcii pontificatus nostri anno octavo