Charter Document - 06760126

Universis [] Johannes divina miseracione abbas de Wygemora et ejusdem loci conventus salutem [] Noveritis universi et singuli quod nos liberalitatis causa per Johannem Bacun canonicum Herefordensem nobis facte sufficientis ad meliorandam domus nostre condicionem et ad nullam penitus lesionem dedimus et concessimus inperpetuum quinque marcas annuas legalium sterlingorum scilicet medietatem in festo annunciacionis beate Marie virginis et aliam medietatem in festo sancti Michaelis apud Herefordiam fideliter persolvendas ad sustentacionem unius vicarii qui ad honorem Dei beate virginis Marie sancti Ethelberti et omnium sanctorum celebret in ecclesia Herefordensi cathedrali missam et divinum officium cotidianum inperpetuum pro animabus patris et matris dicti Johannis Rogeri presbyteri ipsius avunculi Pandulfi et Radulfi Norwicencis et Herefordensis episcoporum et ipsius Johannis et omnium fidelium defunctorum missam siquidem aliquando de die aliquando de beata virginie Maria poterit celebrare Dicte autem pecunie solucio fiet temporibus et locis superius expressis dicto Johanni in vita sua vel vicario ydoneo per ipsum canonicum assignato vel ad nostram vel successorum nostrorum presentacionem successive per Herefordense capitulum instituto Ita tamen quod si nos vel successores nostri per viginti dies in presentando fuerimus negligentes dictum capitulum substituat vicarium ad hoc dignum Sic autem quando a nobis aliquid percipiat jurabit super sancta evangelia idem vicarius quod missam et divinum officium sicut superius est annotatum plene et distincte celebrabit nisi causa racionabili fuerit impeditus et quod cuncta sibi commissa racione divini officii ad opus sui successoris fideliter conservabit Obligamus eciam presenti scripto ex certa sciencia et non circumventi nos et successores nostros omnia bona nostri monasterii mobilia et immobilia temporalia et spiritualia ad dictas quinque marcas annuas supradictis temporibus et locis fideliter persolvendas dantes et concedentes pro nobis et successoribus nostris licenciam et potestatem episcopo Herefordensi qui tunc temporis fuerit vel ejus officiali vel eciam capitulo Herefordensi vel cuilibet judici per dictum vicarium electo quod possit ad instanciam dicti vicarii sine qualibet citacione aut judiciali strepitu et sine onere alicujus probacionis nostrum monasterium et omnes ecclesias nostras parochiales quas in dioecesi Herefordensi habeamus ecclesiastico supponere interdicto usque ad plenarium satisfaccionem de dampnis et expensis et dicte pecunie numeracione si quod absit in dicta solucione cessaverimus Volumus eciam et ad ordinacionem dicti canonici concessimus quod supradictus vicarius die obitus dicti canonici annuatim post ipsius decessum solvat inperpetuum dimidiam marcam canonicis Herefordie et clericis ejusdem loci infra sacros ordines constitutis quos presentes adesse contigerit in ipsius anniversarii celebracione scilicet canonicis antedictis quadraginta denarios et dictis clericis alios quadraginta Dictus vero vicarius habeat sexaginta solidos ad victum et sequatur chorum Herefordie ut cultus divinus feliciter augmentetur Et quia volumus [] Actum in crastino sancti Hyllarii anno Domini MCCXLVIIJ