Charter Document - 06760119

Innocencius episcopus servus servorum Dei dilectis filiis decanis et canonicis Herefordonsis ecclesie tam presentibus quam futuris canonice substituendis in perpetuam memoriam Quociens a nobis petitur quod juri et honestati convenire dinoscitur animo nos decet libenti concedere ac petencium desideriis congruum suffragium impertiri Quapropter dilecti in Domino filii vestris justis postulacionibus clementer annuimus et ecclesiam Herefordensem in qua divino estis obsequio mancipati sub beati Petri ac nostra proteccione suscipimus et presentis scripti privilegio communimus statuentes ut quascunque possessiones quecumque bona eadem ecclesia impresenciarum juste et canonice possidet aut in futurum concessione pontificum largicione regum vel principum oblacione piorum seu aliis justis modis prestante Domino poterit adipisci firma vobis vestrisque successoribus illibata remaneant In quibus hec propriis duximus exprimenda vocabulis Locum ipsum in quo prefata ecclesia sita est cum omnibus pertinenciis suis de Mawordin et Wlwyneope de Madele de Dudelbiri de Beysham de Westone ecclesias cum omnibus pertinenciis suis terras possessiones redditus et alia que habetis in civitate Herefordensi in villis de parva Pionia et majori Pionia de Maddele de Wlwyneope de Mawordin et de Hamptune necnon et possessiones alias cum pratis vineis terris nemoribus usuagiis et pascuis in bosco et plano in aquis et molendinis in viis et semitis et omnibus aliis libertatibus et immunitatibus suis Cum autem generale interdictum terre fuerit clausis januis interdictis et excommunicatis exclusis non pulsatis campanis suppressa voce divina officia celebrare dummodo causam non dederitis interdicto nec id contingat vobis specialiter interdici Ordinaciones quoque clericorum qui ad ordines fuerint promovendi a vestro suscipietis episcopo si quidem catholicus fuerit et graciam et communionem sacrosancte Romane sedis habuerit et ea vobis voluerit sine pravitate aliqua exhibere Sepulturam quoque ipsius loci liberam esse decernimus ut eorum devocioni et extreme voluntati qui se illic sepeliri deliberaverint nisi forte excommunicati vel interdicti sint aut eciam usurarii nullus obsistat salva tamen justicia illarum ecclesiarum a quibus corpora mortuorum assumuntur Preterea omnes libertates immunitates a predecessoribus nostris Romanis pontificibus ecclesie vestre concessas necnon libertates et exempciones secularium exaccionum a regibus principibus vel aliis fidelibus racionabiliter vobis indultas ac eciam antiquas et racionabiles consuetudines in eadem ecclesia pacifice hactenus observatas auctoritate apostolica confirmamus et presentis scripti privilegio communimus Decernimus ergo ut nulli omnino hominum liceat prefatam ecclesiam temere perturbare aut ejus possessiones auferre vel oblatas retinere minuere seu quibuslibet vexacionibus fatigare set omnia integra conserventur eorum pro quorum gubernacione ac sustentacione concessa sunt usibus omnimodis profutura salva sedis apostolice auctoritate et episcopi vestri canonica justicia Si qua igitur in futurum ecclesiastica secularisve persona hanc nostre constitucionis paginam sciens contra eam temere venire temtaverit secundo terciove commonita nisi reatum suum congrua satisfaccione correxerit potestatatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore et sanguine Dei et Domini redemptoris nostri Jesus Christi aliena fiat atque in extremo examine districte subjaceat ulcioni Cunctis autem eidem loco sua jura servantibus sit pax domini nostri Jesu Christi quatinus hic fructum bone accionis percipiant et apud districtum judicem premia eterne pacis inveniant Amen Ego Petrus tituli sancti Marcelli presbyter cardinalis Ego Willelmus basilice duodecim apostolorum presbyter cardinalis Ego frater Johannes tituli sancti Laurencii in Lucina presbyter cardinalis Ego frater Hugo tituli sancte Sabine presbyter cardinalis Ego Oto penitenciarius sancte Rufine episcopus Ego Petrus Albanensis episcopus Ego Willelmus Sabinensis episcopus Ego Egidius sanctorum Cosmi et Damiani diaconus cardinalis Ego Octavianus sancte Marie in via lata diaconus cardinalis Ego Petrus sancti Georgii ad Velabrum diaconus cardinalis Ego Johannes sancti Nicholai in carcere Tulliano diaconus cardinalis Ego Willelmus sancti Eustachii diaconus cardinalis Datum Lugduni per manum magistri Marini sancte Romane ecclesie vice cancellarii v kalendas Maii indiccione iiij incarnacionis dominice anno MCCXLVJ pontificatus vero domini Innocencii pape iiij anno tercio