Charter Document - 06760098

Omnibus [] Stephanus permissione divina Cantuariensis ecclesie minister humilis totius Anglie primas et sancte Romane ecclesie cardinalis salutem in Domino Quum omnes ut ait apostolus stabimus ante tribunal Domini nostri recepturi prout in corpore gessimus sive bonum fuerit sive malum oportet nos diem messionis extreme operibus misericordie prevenire ac seminare in terris quod cum fructu multiplicato Domino concedente recolligere debeamus in celis firmam spem fiduciamque tenentes quum qui parce seminat parce eciam metet et qui seminat in benediccionibus de benediccionibus eciam metet vitam eternam Cum igitur elemosine cultus inter alia caritatis opera debeat non modice computari universitatem vestram in Domino duximus commonendam in remissionem peccatorum injungentes quatinus de bonis a Deo vobis collatis ad edificacionem domus elemosinarie pauperum juxta ecclesiam beati Ethelberti Herefordie site facte a dilectis filiis decano et capitulo et Elya de Bristowe canonico Herefordensi in domibus que fuerunt Stephani filii Hugonis et ad sustentacionem pauperum causa elemosine illuc divertencium aliqua caritatis subsidia misericorditer erogetis ut per hec et alia bona que feceritis eterna possitis gaudia promereri Hoc autem de Dei misericordia et beate virginis et omnium sanctorum meritis confidentes omnibus qui ad edificacionem predicte domus pauperum et ad sustentacionem eorundem pias elemosinas duxerint conferendas si de peccatis suis contriti fuerint et confessi tredecim dies de injuncta sibi penitencia relaxamus Nolumus autem quod per has litteras nostras predicator aliquis admittatur set illa sufficiat predicacio que presentibus litteris continetur Datum anno Domini MCC vicesimo sexto mense Augusto Valeatis in Domino