Charter Document - 06751012
Charter Number: | 06751012 |
---|---|
Cartulary Title: | The Correspondence, Inventories, Account Rolls, and Law Proceedings, of the Priory of Coldingham |
Charter Language: | Latin |
Charter Origin: | Papal |
Charter Type(s): | Mandate |
Date: | 1290 |
Date type: | Internal, Calendar, Papal |
Resource Link(s): |
|
Charter:
Nicholaus episcopus servus servorum Dei carissimo in Christo filio Edwardo Regi Anglie illustri salutem et apostolicam benedictionem Gerentes cordi negotium Terre Sancte celsitudini tue decimam ecclesiasticorum reddituum et proventuum in Anglie et Scotie regnis ac Ybernia et Wallia in ipsius Terre Sancte subsidium sub certa forma per certi temporis spatium duximus concedendum prout in Apostolicis litteris super hoc confectis plenius et serius continetur Quia tamen in regnis ac Ybernia et Wallia supradictis diverse ut dicitur fiunt estimationes reddituum et proventuum predictorum statuimus ut juxta verum ipsorum valorem tibi predicta decima persolvatur Sed ne in collectione ipsius si congruo modo non fieret multorum scandala et animarum possent pericula suboriri nostre intentionis existit ut in collectione ipsa per deputandas a sede apostolica personas taliter actore Domino procedatur quod et hujusmodi scandala sive pericula valeant evitari et indemnitati tue condigno favore quantum ad perceptionem prelibate decime provide consulatur Dat Rome apud Sanctam Mariam majorem quarto idus Januarii Pontificatus nostri anno secundo