Charter Document - 06700083
| Charter Number: | 06700083 |
|---|---|
| Cartulary Title: | Memorials of St. Edmunds Abbey [Bury St. Edmunds]. |
| Charter Language: | Latin |
| Charter Origin: | Religious |
| Charter Type(s): | Promise |
| Date: | 1261 |
| Date type: | Internal, A.D., Calendar |
| Resource Link(s): |
British Library - Cotton MS Claudius A XII (f88r) |
Charter:
Universis Christi fidelibus presentes literas visuris vel audituris Robertus perpetuus vicarius ecclesie de Wlpet salutem in Domino Noveritis quod cum in solutione viginti marcarum annue pensionis debite domino abbati et conventui sancti Edmundi de bonis dicte ecclesie de Wlpet secundum tenorem ordinationis facte a bone memorie Waltero quondam episcopo Norwicensi per biennium et ultra cessassem inconsulte tandem domini abbas prior et conventus pietate et misericordia moti inopie mee compatientes arreragia temporis preteriti usque ad quindecim marcas remiserunt ita quod centum solidos de predictis quindecim marcis in synodo paschali de Gyppewyco proxime ventura fideliter eis persolvam et alios centum solidos in festo nativitatis sancti Johannis Baptiste proxime sequenti et totam pensionem predictam terminis statutis in predicta ordinatione reddam eisdem integraliter et fideliter persolvam Hec omnia sine fraude observanda constitutus in presentia domini Norwicensis episcopi in ecclesia de Pakenham die Jovis proxima post festum sancti Gregorii anno Domini MCCLX in verbo veritatis et sacerdotii repromisi subjiciens me jurisdictioni et coercioni dicti domini Norwicensis quod possit me ad hec omnia observanda compellere per interdicti et excommunicationis sententias necnon per subtractionem proventuum beneficii mei et privationem ejusdem si opus fuerit sine cause cognitione vel strepitu judiciali In cujus rei testimonium signum domini Norwicensis una cum sigillo meo presentibus est appensum Datum apud Thorned quinto kalendas Aprilis anno gratie millesimo CC sexagesimo primo