Charter Document - 06640051
| Charter Number: | 06640051 |
|---|---|
| Cartulary Title: | Historiae Dunelmensis Scriptores Tres [Durham] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1226 |
| Date type: | Internal, Calendar, Papal |
| Resource Link(s): |
Durham Cathedral Archive - Cartulary III (f155v) Durham Cathedral Archive - 2.1.Pap.17 |
Charter:
Honorius Episcopus servus servorum Dei venerabili fratri Archiepiscopo Eboracensi salutem et apostolicam benediccionem Significantibus Priore ac Conventu Dunelmensis ecclesie nobis innotuit quod Ecclesia ipsa nuper pastore vacante ipsi de substitucione futuri Episcopi Tractaturi prout moris est convenientes in unum invocata Spiritus Sancti gratia magistrum Willielmum Wigorniensem Archidiaconum quem de providencia honestate literatura et morum composicione commendant canonice ac concorditer in suum Episcopum elegerunt sed cum tibi tanquam loci metropolitano eleccionem quam de ipso fecerant presentassent tu ad examinacionem ipsius procedere hactenus distulisti unde humiliter petierunt ut dignaremur misericorditer providere ne dicta ecclesia diu maneat pastoris solacio destituta Cum autem mora in talibus plurimum ecclesiis sit dampnosa fraternitati tue per apostolica scripta mandamus quatinus infra duarum mensium spacium post recepcionem presencium in ipsius eleccionis negocio juxta officii tui debitum previa racione procedas Quod si forte infra predictum tempus non duxeris procedendum eleccionis formam et processum ipsius ad nos sine dispendio more remittas ut super hoc quod secundum Deum statuendum viderimus statuamus Data Laterani vi kalendas Januarii pontificatus nostri anno undecimo