Charter Document - 06640044
| Charter Number: | 06640044 |
|---|---|
| Cartulary Title: | Historiae Dunelmensis Scriptores Tres [Durham] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1189 |
| Date type: | Internal, Calendar, Papal |
| Resource Link(s): |
Durham Cathedral Archive - Cartulary III (f152v) |
Charter:
Clemens Episcopus servus servorum Dei venerabili fratri Hugoni Dunelmensi episcopo salutem et apostolicam benediccionem Licet personam tuam tanquam in Christo karissimum et quem multorum asserunt preconia commendandum sincera diligamus in Domino caritate et quecumque per te racionabiliter postulaveris exequi favorabiliter intendamus ad preces a tamen karissimi in Christo filii nostri Ricardi Anglorum regis quem inter ceteros orbis principes sincere caritatis brachiis amplexamur quedam tibi specialiter duximus injungenda que statu orientalis terre considerato temporibus istis alicui sano et bene valenti non fuerant de facili concedenda Inde est quod cum idem illustris Rex prout scripto nobis et nunciis intimavit pro regni sui custodia te ad presens duxerit a Jerosolimitano itinere retinendum et nos ipsi regno suo expedire credamus ipsius Regis precibus provocati et ecclesiarum utilitate pensata fraternitati tue auctoritate presencium districte precipimus quatinus usque ad reditum ipsius Regis quem prosperum Domino duce desideramus a proposito non postponas itinere remanere eos vero qui occasione tua crucem assumpserant quos tibi necessarios videris volumus ut tibi liceat ad tuum interim servitium retinere Post reditum autem predicti Regis in optione tua ponimus utrum terram sanctam in persona propria vel rebus volueris visitare Interim tamen quia nec tuo officio expedit nec videtur congruum crucis signa Domini bajulare volumus ut crucem deponas Si vero interim aliquem ex vobis viam universe carnis in bona confessione contigerit ingredi illius remissionis de apostolice sedis indulgencia particeps habeatur que in persona propria laborantibus est indulta Data Lateran ii nonis Decembris pontificatus nostri anno secundo