Charter Document - 06540190

Serenissimo Domino Henrico [] Thomas prior [] Cum a vestre regie dignitatis sublimitate licentia elegendi nobis pastorem et episcopum quam erga nos et alios religiosos [] benignitate fuisset concessa nuntiis nostris ad nos die Jovis proxima ante Purificationem redeuntibus diem Veneris proximum post festum Purificationis ad eligendum prefiximus nobis prospicere et diversis periculis obviare cupientes precipue periculo imminenti constitutionis qua cavetur ne ultra tres menses Cathedralis ecclesia prelato non vacet infra quos justo impedimento cessante si electio celebrata non fuerit qui eligere debuerant eligendi potestate careant hac vice Die igitur prefixo secundum formam mandati vestri cui pro omni posse parere desideravimus et desideramus elegimus in episcopum nostrum personam ut firmiter credimus Deo acceptum et episcopatus regimini et officio sufficientem et vobis fidelem et regno vestro utilem existentem sc magistrum Robertum Precentorem Sarum cujus eminentem scientiam morum et conversationis honestatem vobis et concilio vestro acceptam et commendatam divina ut speramus reddet providentia Qui diligenti habito deliberatione de consiliis Decani et fratrum Capituli Sarum propositis coram eisdem fratribus jure Bathonie ecclesie et tota processione et negotiis dictam electionem contingentibus electioni de se facte concessit in dictorum fratrum presentia Duodecimo autem die post dictum diem electionis fuit speciale mandatum pro domino P Thesaurario vestro directum primo nobis oblatum per P clericum vicesimo autem die post memoratam diem electionis fuerit iterato nobis alie littere exhibite per Nicholaum servientem Quibus temporibus nullo modo factum nostrum mutare potuimus Vestram igitur devote et humiliter pedibus vestre pietatis provoluti rogamus clementiam quatinus impossibilitatem nostram divine caritatis intuitu velitis habere excusatam cum in omnibus que nostre fuerint possibilitatis vestris parati simus affectuose parere mandatis Valeat []