Charter Document - 06511135

Her is geswutelod on þisum gewrite hu Aþelwold bisceop begeat at his leofan cynehlaforde Eadgare cyninge þæt he mid geþeahte his witana geniwode Ciltancumbes freols þære halgan þrynnesse and sancte Petre and sancte Paule into Wintanceastre þan hirede on ealdan mynstre ealswa his yldran hit ær gefreodon ærest Cynegils cyning and his sunu Cynewald cyning þe on angynne cristendomes hit sealdan ealswa hit lið on ælche healfe þæs portes into þære halgan stowe and syððan ealle heora æftergengen þæt wæs Egcbirt cynincg and Aþulf cyning and Ælfred cynincg and Eadweard cynincg and he geuðe þæt man þæt land on eallum þingon for ane hide werode swa swa his yldran hit ær gesetton and gefreodon wære þær mare landes wære þær læsse and he bead on Godes naman þæt naðer ne þære stowe bisceop ne nanes bisceopes æftergenga þæt land næfre of þære stowe geutode ne hit nanan portmen wið nanan sceatte ne wið ceape gesealde and he bead þurh Godes ælmichtiges myclan mægenþrymm þæt nan his bearna ne nan heora æftergengcana þæt menster æfre leng mid preostan gesette ac þæt hit efre mid munecan stode swa swa he hit mid Godes ælmilhtiges fultume gesette þa þa he hit þa modigan preostas for heora mandædon þanan ut adrefde and þerinne munecas gelogode þæt hi Godes þeowedom æfter sancte Benedictes tæcinge and dæghwamlice to Gode cleopodon for ealles cristenes folces alidsednesse Ealles þæs landes is an hund hida ac þa godan cynegas and þa wisan ælc æfter oþran þæt ylce land swa gefreodon Gode to lofe and his þeowan to brycen and to fostorlande þæt hit man æfre on ende for ane hide werian sceolde Se þe þysne freols healdan wille God ælmihtig hine gehealde her and on ecnesse Gif hwa þonne þurh ænige dyrstignesse oððe þurh deofles lare þisne freols abrecan wille oððe þas gesetednesse on oðer awendan durre Se he awyrged mid eallan þan awyrgednessan þe synd awritene on eallan halgan bocan and sy he ascyred fram ures Drichtnes gemanan and ealra his halgana and sy he gebunden þa hwile þe he libbe on þisam life mid þan ylcan bendan þe God ælmihtig þyrh hine sylfne betæchte his halgan apostolan Petre and Paule and æfter his awyrgedan forðsiðe ligge he efre on healle grundleasan pytte and byrne he on þan ecan fyre mid deofle and his englan a butan ælcan ende butan he hit ær his forðsiðe gebete Amen