Charter Document - 06511129
| Charter Number: | 06511129 |
|---|---|
| Cartulary Title: | Charters of the Old Minster, Winchester |
| Charter Language: | English |
| Charter Origin: | Royal |
| Charter Type(s): | Renewal |
| Date: | 0968 |
| Date type: | Internal, A.D. |
| Resource Link(s): |
eSawyer (S 806) |
Charter:
Her ys geswutelod on þysum gewrite hu Eadgar cyning mid geþeahte his witena geniwode Tantunes freols þære halgan þrynnesse and sancte Petre and sancte Paule into Wintanceastre to þam biscopstole ealswa Eadweard cyning hit ær gefreode and geuþe þæt ægþer ge twelfhynde men ge twyhynde weron on þam Godes hame þara ylcan gerihta wyrþe þe his agene men sindon on his agenum cynehamum and man ealle spæca and gerihtu on þæt ylce gemet gefe to Godes handa þe man to his agenre drifh and þes tunes ciyping and seo innung þara portgerihta gange into þere halgan stowe ealswa heo ær dyde on myra vldrena dagon and Ælfeage biscope gehafod wæs and gewylcvm þara þe þes landes breac Se þe þisne freols geycean wille geyce God his gesynta to langsumun life her and on ecnesse Gif hwa þonne þurh gedyrstignesse and deofles oþþe his lima lare þysne freols abrecan wille oþþe on oþer awendan buton he hit ær his fordsiþe gebete sy he mid awurgednesse ascyred fram ures drithnes gemanan and ealra his halgena and on helle susle ecelice getintragod mid Iudan þe Cristes lewa wes Ðonne gesealde Aðelwold biscop his cynehlaforde twa und mancussa goldes and anne sylfrene lefel on fif pundum wiþe niwunge þyses freolses and Ælfþryde his gebeddan healf hund mancussa goldes wiþ richtes ærendes fultume and ær wænon wiþ freolse gesealt on Eadwardes dege cinges syxtig hide landes x at Crawancumbe and x at Cumbtune and at Bananwille xx and xx at Scealdeburnan stoce and eft Eadward cyning gesealde þæt land at Cumbtune and at Bananwille þan hiwon at Ceodre wiþ þan lande at Carintune Þis wes gedon at Ceodre on þere halgan eastertide þy geare weron agangene DCCCC geara and eahta and hundseofontig fram Cristes acynnednesse and þe teoþan geare his cynelican anwealdes on gewitnesse þara witena þe hiora noman herwiþ neoþan awritene syndon