Charter Document - 06510205
| Charter Number: | 06510205 |
|---|---|
| Cartulary Title: | Charters of the Old Minster, Winchester |
| Charter Language: | English |
| Charter Origin: | Religious |
| Charter Type(s): | Agreement |
| Date: | 1053 |
| Date type: | Assigned |
| Resource Link(s): |
eSawyer (S 1476) |
Charter:
Her swytelað on þisum gewritæ þæt Ælfgifu seo hlefdige bæcweð v hida at Heilincigæ into ealdan mynstræ And heo bæcwæð Wulfweardæ hwitan v hida of þam ilcan landæ his dæg And æftær his dæge ga þa v hida into ealdan mynstræ þus seo hlæfdige hit bæcwed Wulfweardæ Þa wes Wulfweard gyrnenðæ þæt hæ mostæ ofgan his deg þa v hida þæ wæron into mynstre bæcweðene And sæ bisceop Stigandæ and sæ hiræd on ealdan mynstræ him þæs gætiþodon wið scylcon gersumen swylce hi þa sehtæ wæron Nu wæron þus heora forewæarð þæt Wulfweard hebbæ þa v hida his dæg And æftær his dæge ga þa v hida into ealdan mynstræ And þa oþræ v hida forð mið þæ seo hlæfdige him bæcwæð mid mæte and mid mannum and mid eallum þingum swa hit þonnæ stænt butan ælcon geantalæ Ðises is to witnæssæ Stigandæ bisceop and Harold eorl And sæ hired on ealdan mynstræ And Ælfwine abbod And sæ hired on niwan mynstræ and Leofing stæallære And Raulf stæallære And Æscar steallære and Eadsige scirgeræfa And Wulfric at Wernæforda And Ælfwine And Ælfweard And Cupping And eallæ scirþegnas on Hamtunsciræ Þissæ gewrita syndon iii an is on ealdan mynstræ And þæt oþær is on niwan mynstre And þæt þridde heafð Wulfwearð