Charter Document - 06510179
| Charter Number: | 06510179 |
|---|---|
| Cartulary Title: | Charters of the Old Minster, Winchester |
| Charter Language: | Latin, English |
| Charter Origin: | Royal |
| Charter Type(s): | Restoration |
| Date: | 0996 |
| Date type: | Internal, A.D. |
| Resource Link(s): |
eSawyer (S 889) |
Charter:
Eterni gubernacula imperii moderante in perpetuum domino et saluatore nostro Ihesu Christo Certissimis pupillarum optutibus quadripartiti mundi cotidie magis ac magis imminere cernitur occasus qui quamuis crescendo decrescat et augmentando minuatur fidelibus tamen diuinitus est concessum ut nequaquam toti cum deficiente deficiant sed per umbratilis substantiæ mercimonium permanentem sibi thesaurizent in celis thesaurum quo iuxta illud dominici promissi Fur non appropiat neque tinea corrumpit Quapropter superni amoris igniculo succensus ego Æðelred altithroni fauente gratia basileus Anglorum ceterarumque gentium in circuitu persistentium sancte dei ecclesie Wentana ciuitate beato Petro apostolorum principi eiusque coapostolo Paulo ob reuerende trinitatis honorem consecrate Ælphego eiusdem sedis antistite impetrante pro meorum expiatione piaculorum meique statu imperii quandam hospicii portionem in præfata ciuitate sitam que patria lingua haga solet appellari uti nobilis matrona Ælfswyð deo omnipotenti eiusque prænominatis apostolis hereditario iure concesserat quamuis post obitum ipsius eadem possessio ueluti solet a quibusdam personis iniuste possessa fuerit libens ad usus fratrum in præfato Ueteri cenobio christo famulantium æternaliter possidendam restituendo concedo et concedendo restituo necnon et dimidium cuiusdam piscarii uadum ad capturam piscium at Bræge decurrentem ad Uetus scilicet monasterium pertinentum cum unius iugeris sibi adiacentis portione perpetuo iure possidendum concedo Et hoc tam mea quam dei omnipotentis auctoritate præcipio ut nemo successorum meorum regum episcoporum ducum principumne aut alicuius superioris seu inferioris dignitatis hoc restitutionis mee donarium uiolare uel mutare præsumat Si quis igitur hæc ausu temerario subuertere et a præfato loco sancto auferre conatus fuerit eterne maledictionis sententie subiaceat et penis eterne dampnationis inuolutus cum tetre caliginis agminibus sine fine puniatur nisi digna satisfactione emendauerit quod contra gloriosos apostolorum principes delinquere non timuit porro circuitus eiusdem hospicii pro cuius libertatis causa hanc cartam scribere concessi ita se habere uidetur Ðis is ðes hagan embegang ðe Æðelred cing geuðe into Ealdan mynstre ofer Wulfsiges dæg preostes Ærest fram Leofan hagan west andlang cypstræte oð hit cymð to flæsmangere stræte andlang flæscmangara stræte ðet it cymð to scyldwyrhtana stræte andlang scyldwyrhtana stræte east eft ðæt hit cymð to Leofan hagan Anno dominice incarnationis DCCCCXCVI scripta est hæc eadem præfate restaurationis schedula his testibus consentientibus quorum inferius uocabula caraxantur + Ego Æðelred Anglorum basileus præfatum hospicii donum cum dimidio piscario Christo eiusque apostolis concessi + Ego Ælfric Dorouernensis archiepiscopus prenominate trine donationi consensi et benedixi + Ego Ealdulf Eboracensis ecclesie archiepiscopus huic regie dapsilitatem sustentationi satis largiter impertiui + Ego Ælpheah Wintoniensis ecclesie episcopus hanc præfatam donationem uoti compos obtinui + Ego Wlfstan Lundoniensis ecclesie episcopus huic eidem sepenominate munificientie consentaneus extiti + Ego Wlfsige episcopus consensi + Ego Ælfheah episcopus consignaui + Ego Ordbryht episcopus consolidaui + Ego Ælfwold episcopus corroboraui + Ego Goduuine episcopus consigillaui + Ego Aðulf episcopus confirmaui + Ego Ealdred episcopus conclusi + Ego Æðelweard dux + Ego Ælfric dux + Ego Ælfhelm dux + Ego Leofsige dux + Ego Æðelmer dux + Ego Ordulf dux + Ego Wlfget dux Nos uniuersi regis optimates huic regie donationi unanimen consensum alacriter prebuimus