Charter Document - 06510178
| Charter Number: | 06510178 |
|---|---|
| Cartulary Title: | Charters of the Old Minster, Winchester |
| Charter Language: | English |
| Charter Origin: | Royal |
| Charter Type(s): | Testimony |
| Date: | 0995 - 1002 |
| Date type: | Assigned |
| Resource Link(s): |
eSawyer (S 1242) |
Charter:
Alfðryð gret Ælfric arcebiscop and Eþelwerd ealdarman eadmodlice and ic cyðe inc ðet ic eom to gewitnysse þæt Dunstan arcebiscop getehte Aþelwolde biscope Tantun eal swa his bec specon and Eadgar cyning hit agef ða and bead ælcon his þegna þe enig land on þan lande hafde þæt hi hit ofeodon be þes biscopes gemedon oððe hit agefum and se cyning cwæð þa þet he nahte nan land ut to syllanne þa he ne dorste fram Godes ege him sylf ðet heafod habban and ma gerad þa Risctun to þes biscopes handa and Wulfgyþ rad þa to me to Cumbe and gesohte me and ic ða for þan þe heo me gesib was and Ælfswyð for þan þe he hyre broþor was abedon at Aðelwold biscope þæt hi moston brucan þes landes hyra deg and efter hyra dege eode þet lond into Tantune mid mete and mid mannum eal swa hit stode and wit hyt swiðe uneaðe to þan brocton Nu cydde man me þæt Aðelwold bisceop and ic sceoldon ofneadian þa boc at Leofrice Nu ne eom ic nanre neade gecnewe þe libbe þe ma þe he wolde þeah he lyfode Ac Leofric hafde ane niwe boc þa agef he þa þa cydde he mid þan þet he nolde nan fals þer on don þa cydde Aðelwold bisceop him þæt hine ne mihte nan his eftergenga bereafian het þa gewritan twa gewritu oðer him sulf hefde oþer he Leofrice sealde