Charter Document - 06510146
| Charter Number: | 06510146 |
|---|---|
| Cartulary Title: | Charters of the Old Minster, Winchester |
| Charter Language: | English |
| Charter Origin: | Religious |
| Charter Type(s): | Record |
| Date: | 0964 - 0975 |
| Date type: | Assigned |
| Resource Link(s): |
eSawyer (S 1449) |
Charter:
Her is geswitulod on ðysum gewrite hu Eadgar cining mid rymette gedihligean het þa mynstra on Wintancestræ syþþan he hi ðurh Godes gyfe to munuclife gedyde and þet asmeagan het þæt nan ðera mynstera þær binnan þurh þet rymet wid oðrum sace næfde ac gif oðres mynstres ar on oðres mynstres rymette lege þæt þes mynstres ealdor ðe to þam rymette fenge ofeode þæs oðres mynstres are mid swilcum þingum swylce ðam hirede ðæ þa are ahte gecweme wære for ðy ðonne Aþelwold bisceop on þes cinges gewitnesse and ealles þæs hiredes his bisceopstoles gesealde twa gegrynd butan svð geate into niwan mynstre ongen ðes mynstres mylne ðe stod on ðam rymette ðe se cing het gerymen into ealdan mynstre and se abbod Æþelgar mid geðeahte ures cynelafordes and þes bysceopes Aþelwoldes and ealles þæs hiredes þa ylcan mylne þe se bisceop seolde and oðre þæ hi ær ahtun binnan þære byrig to sibbe and to some gesealde into nunnan mynstre and Eadgyfe abbedesse þæs cinges dohter betehte ongen ðone weterscype þe he into niwan mynstre be ðes cinges leafan geteah and ær ðes nunhiredes wes and him se tige sume mylne adilgade and he gesealde þam cinge hundtwelftig mancæs reades goldes to ðance beforan Ælfdryðe ðære hlæfdian and beforan þam bisceopan Aðelwolde wið þam lande ðæ seo ea on yrnð fram ðam norðwealle to þæs mynstres suðwealle an lencge and twegræ metgyrda brad ðer þæt wæter ærest infylð and þær þæt land unbradest is þer hit sceol beon eahtatyne fota brad ðyses ic geann Æþelgare abbode and þam hirede into niwan mynstre for his gecwemre gehyrsumnesse a on ecnesse and ic halsige ælc ðara ðe eftær me cynerices wealde þurh ða halgan ðrynnesse þet hyra nan næ undo þet ic to ðam haligum mynstrum binnan þære byrig gedon hebbe Se þe ðis þonne awendan wylle ðe ic to sibbe and to gesehtnesse betweoh þam mynstre geradigod hæbbe odðe þara ðinga þe on þissan þrim cyrogafum ðe on ðissum þrym mynstrum to swytelungum gesette syndon awende hine se eca drihten fram heofenan rice and su his wunung æfter his forðsiðe on helle wite mid þam ðe symle on ælcre ungeþwærnesse blissiað butan he hit ær his forðsiðe gebete