Charter Document - 06510142
| Charter Number: | 06510142 |
|---|---|
| Cartulary Title: | Charters of the Old Minster, Winchester |
| Charter Language: | Latin |
| Charter Origin: | Royal |
| Charter Type(s): | Grant |
| Date: | 0963 - 0975 |
| Date type: | Assigned |
| Resource Link(s): |
eSawyer (S 824) |
Charter:
Ecce Christo in eternum regnante cunctis sophiæ studium intento mentis conamine sedulo rimantibus liquido patescit quod huius vitæ periculis nimio ingruentibus terrore recidivi terminus cosmi appropinquare dinoscitur ut veridica Christi promulgat sententia qua dicit Surget gens contra gentem et regnum adversus regnum et reliqua Quamobrem ego Eadgar Christi conferente gratia tocius Britanniæ basileus domino nostro Jhesu Christo totis viribus ante futuri tempus judicii placere desiderans quandam telluris particulam xl videlicet mansas tribus in locis diremptas xx at Uferantune cum silva at Tadanleage huic ruri pertinente xv at Wealtham v at Bradanleage ut a meis dudum supra dictæ Wintoniensi basilicæ reverende trinitati ejusque apostolis Petro atque Paulo æternæ largitum fuerat ita hac nova cartula cum meorum auctoritate procerum Aðelwoldo præsule obtinente roboratum eterna humilis renovo libertate Sint autem omnia hæc supradicta rura omni terrenæ servitutis jugo libera tribus exceptis rata videlicet expeditione pontis arcisve restauratione Maneat igitur hæc nostra largiflue renovata dapsilitas uti fuerat fixa per evum Si quis igitur hanc ecclesie libertatem violare præsumpserit anathema sit et inferni cruciatibus attritus infelix intereat nisi satisfaciendo ante obitum veniam optinuerit