Charter Document - 06510139
| Charter Number: | 06510139 |
|---|---|
| Cartulary Title: | Charters of the Old Minster, Winchester |
| Charter Language: | Latin |
| Charter Origin: | Royal |
| Charter Type(s): | Restoration |
| Date: | 0963 - 0975 |
| Date type: | Assigned |
| Resource Link(s): |
eSawyer (S 821) |
Charter:
Altithronus totius creature plasmator universa quæ miro ineffabilique condidit ordine per sex dies luculenter exprimens formulas distinxit singulorum Nam bona a bono edita creatore cuncta tenorem pulchre servant naturalem excepto homine miseranda seducto cavillatione et angelo prævaricatore superbissimo Per quem pro dolor omnis inrepsit adversitas in genus humanum Nam multis infacetum probo si seculi novis cunctis liquido intimatur sophistis Inlectum si quidem nefandi neniis cosmi cælestes ipsius pompas inconsiderate ambiendo supernæque patriæ emolumenta amittendo celsi throni moderatis gratia privatum barathri incendiis lugubriter depulsum jugi miseria puniri merito compulsum est Quod tandem divina gratia cunctis succurrens mortalibus gratuite bonum videlicet pro malis restituendo solutis facinorum repagulis baptismatis regeneratione pianda crucisque gabulum ascendendo in seculorum fine miserando gloriosa eripuit libertate Quæ videlicet libertas in totum per apostolos dilatata orbem domini annuente clementia ad Uuest Seaxan sancto prædicante Birino directa est Præfatus equidem pontifex primo regem Cynegisl Deinde Cynewealh nuncupatum fidei rudimentis imbutum baptismatis fonte regeneravit Qui videlicet rex ecclesiam Uuintonia ilico pulchræ edidit reverendeque trinatati ac individuæ unitati necnon beato Petro apostolorum principi ejusque coapostolo Paulo dedicare fecit cathedramque episcopalem inibi constituens bonis a Deo sibi collatis locupletans uberrimæ ditavit Inde itaque primum copiosa fidei seges paulatim pereunte gentilitatis lolio baptismatis lavacro irrigata pullulans secrevit Quæ domini gratia per totam occidentalem Saxoniam ecclesie cultoribus sata granaria domini multiplici reditu replendo usque in hodiernum diem incessabiliter accumulat Huic ego Eadgar tocius Britanniæ basileus ejusdem lætæ segetis Christi annuente clementia occa exuberans primitias Christianæ dapsilitatis a predicto Cynewalhho humani generis redemptori oblatas et A Ceadwalla rege successionis tempore hereditaria con solidatas cartula et a quibusdam prædecessoribus meis injuste moderno ablatas tempore ob animæ meæ remedium regnique nostri prosperitatem predictæ Uuintoniensi ecclesie humillima reddo devotione c scilicet mansas loco qui celebri at Duntune nuncupatur onomate adque xxx in Uecta insula quæ noto Etdreðecumb appellantur vocabulo cum omnibus utensilibus pratis videlicet silvis salinaria capturis molendinis et omnibus commodis huic ruri pertinentibus reverende trinitati predictisque ejus apostolis satisfaciendo restituens Identidem suburbana ejusdem præcipuæ civitatis Cyltancumb videlicet cum suis appendiciis benignissime renovare cupiens eadem dito libertate qua a rege uti dicam primogenito ejusdem ecclesie neophito ad usum præsulis eidemque loco subjectæ familiæ a catholicis priscis ditatum perhibetur temporibus Pastus igitur predictæ familiæ nullatenus præsumptuose minuatur sed fideliter ut olim constitutum fuerat a præsule dispensando largiatur Dignum itaque saluberrimo optimatum meorum utens consilio nostræ mentis duxi archano ut nostræ occidentalium Saxonum ecclesie capud nostræque religionis exordium nullatenus aliqua suæ portionis privaretur substantia sed redintegrata ad liquidum cuncta clarescerent ut nobis et præsentis vitæ jocunda prosperitas et futuræ æternæ beatitudinis meritum multiplici fænore fiducialiter eveniret Christo largiente qui cum patre et spiritu sancto cuncta gubernat quæ condidit Supra dictæ igitur augmentum ecclesie dum nostre fit prosperitatis supplementum nostre religionis exordium restaurare cupiens novis quidem cartulis ejus territoria partim per incuriam veterano usu deleta Adelvvoldo præsule humiliter obtinente in hoc præsenti sint hamata distinctis locis semotum non solum ea quæ iniqua ante abstracta rapina a me restituta sunt sed etiam illa quæ olim a prædecessoribus meis æternæ trinitati concessa fuerant pro animæ meæ redemptione et regni nostri prosperitate renovare jubeo Hoc etenim in nomine Jhesu Christi ejusque genitricis semperque virginis Mariæ et beati Petri apostolorum principis omniumque sanctorum subnixus præcipio ut nemo successorum meorum hoc nostrum decretum restaurationemque possessionum ecclesiastici ruris violare vel minuere instinctu demoniis præsumens audeat Qui autem hoc nostrum decretum libertatemque juris ecclesiastici augere munifica voluerit dapsilitate augeat omnipotens dominus ejus et vitam et prosperitatem hic et in futuro seculo ruantque adversarii cuncti ante faciem ejus terrore domini velociter prostrati robustusque victor Christi suffragante gratia semper sui cursus stadio persistens vigeat omnisque ejus successura posteritas pollens perpetuo proficiat Qui vero audax præsumptor ausu temerario philargyria seductus violare minuereve temptaverit deleatur ejus nomen de libro vitæ ac per beati Petri apostolorum principis regnique celorum clavigeri auctoritatem paradysi januis eliminatus eternis barathri incendiis jugiter ustulatus Acharonte putido torridoque suffocatus cum Juda Christi proditore ejusque complicibus perenni calamitate jugique miseria a Deo et omnibus sanctis justo dampnatus puniatur judicio nisi satisfactione congrua restituerit quod in Christi possessione minuere presumpsit