Charter Document - 06510136

Mundanæ volubilitas orbita nunquam in eodem statu permanet sed cotidiano defectu more fluentis aquæ decurrit ob id quæ rerum præteritarum effectus oblivioni tradetur Nisi litterarum caracteribus exaretur quibus quasi quodam anchoræ ligamento ne penitus a memoria defluat retinetur hoc quæ modo quæ olim gesta fuerant posteris innotescit Quapropter in hac cartula manifeste declaratur qualiter ego Eadgar opitulante gratuita salvatoris mundi clementia Anglorum basileus Aðelwoldo michi pontificum dilectissimo suggerente cum optimatum meorum consilio devotus renovavi Cyltancumbes hereditariam libertatem quæ vallis undique adjacet Wentanæ civitati eandemque renovatam privilegii libertatem sanctæ et individuæ Trinitati humillime commendavi et in veteri monasterio in ecclesia beatorum Petri et Pauli ad usum monachorum Deo inibi regulariter famulantium et Christo cotidie pro omni Christiano populo supplicantium perpetuo jure conservari præcepi Hanc quoque renovationem in ipsa eademque libertate fine tenus perdurare jussi qua illam ab avis et atavis et ab omnibus regibus antecessoribus meis donatam esse comperi Quorum primi extiterunt Cynegils rex et filius ejus Cynewalh rex qui in exordio Christianæ fidei sancto Birino episcopo verbum Dei prædicante concesserunt ejusdem ruris possessionem ad præfatum sancti loci monasterium Deinde successores eorum scilicet Ecgbirht rex Adulf rex Ælfred rex Eadweard rex et reliqui omnes donec Christi gratia me quando voluit et sicut voluit super omne regnum gentis Anglorum regem constituit Ideoque præcipio in nomine domini nostri Jesu Christi ut juxta priorum decreta regum tota ipsius telluris quantitas cum omnibus appendiciis suis pro una tantummodo mansa ab omnibus posteris reputetur Et ut nullus episcopus ejusdem loci illam terram de ipso monasterio tradere audeat nec alicui secularium pro munere quolibet eam dare præsumat Hoc quoque provida consideratione super addidi et mandavi ut nullus filiorum vel nepotum meorum nec aliquis successorum illorum ad predictum sedis episcopalis cenobium clericos umquam introducat sed locus idem semper monachis Christo ibidem servientibus deputetur sicut ipse ego cooperante Dei omnipotentis auxilio constitui quando superbos clericos qui Deo servire contempserunt pro nefandis suis actibus et detestandis spurcitiis inde eliminatos expuli ibique sacram cenobitarum congregationem qui in hympnis et laudibus domino voluntarie servirent devotus aggregavi Præfatæ siquidem terræ summa centum cassatorum portio est sed tamen ut dictum est a cunctis antecessoribus regibus tam pro illorum quam pro omnium successorum illorum æterna redemptione predicta libertate donata Deoque omnipotenti et sanctis apostolis ejus Petro et Paulo æternaliter concessa est Quicumque hanc libertatem custodire voluerit custodiat eum Deus et hic et in ævum Si quis autem diabolica suggestione deceptus hanc libertatem minuere vel infringere præsumpserit veniant super eum omnium maledictionem genera quæ scripta sunt in veteri et novo testamento sitque cælum ferreum super capud ejus et tellus eneo sub pedibus ejus et sit ipse æterno anathemate separatus a Deo et omnibus sanctis ejus et apostolica beatorum Petri et Pauli auctoritate ligatus sit quam diu vixerit et post maledictum obitum suum gehennalibus flammis cum diabolo et angelis ejus sine fine dampnatus et cruciatus intereat nisi prius emendaverit quod Deum omnipotentem et sanctos apostolos ejus pro nichilo spernere non timuit Huius quoque libertatis renovationem patria lingua hoc est Anglica scribere jussi ne quis secularium de ignorantia se excusare possit quia Latinam sermocinationem forte non didicit Neque eam quamvis coram se legeretur intelligere novit Ad redemptionis suæ augmentum omni conatu cuncti student orthodoxi ut fidei spei caritatisque alis veluti vestium fulgore amicti preciosarumque splendore gemmarum adornati sanctarum virtutum copia perspicui criminum pondere semoti terreni corporis ergastulo versantes lacrimarum valle cum nimio degentes certamine totius animi cultum celesti habitatione theorico figunt meditamine Nostra inquit apostolus conversatio in cælis est Hinc igitur ego Eadgar domini largiente gratia totius Albionis basileus sedula procurans sollicitudine ne catholicorum quispiam actuali degens conversatione aliqua secularium rerum vexatione a contemplativa impeditus vita incongrue revocetur quod olim a prædecessoribus nostris æcclesiis domini ad sui famulatus obsequium egregria concessum fuerat libertate renovando libentissime recupero Huius rei gratia rura omnia predicta et superius distinctis locis ordinatim novis litterarum apicibus designata Christi compunctus spiramine justo utens judicio ad usus pontificum supradictæ ecclesie jura religiosa regentium pro animæ meæ salute regnique ac successorum meorum prosperitate æterna libertate cum optimatum meorum consilio devotus ammodum restitui omnique seculari soluta gloriose ditavi servitute ne vexatione mundanæ afflictionis mens præsulum pro nostris facinoribus intercedentium a divina contemplatione remota deficiendo lasesceret In nomine almæ trinitatis ac individuæ unitatis præcipio ut succedentium temporum episcopi ita gregem dyrocheo id est duplici pastu nutriant monachorum ut nostris temporibus per sapientium ordinatum est providentiam et alimenta ex Ciltancumbe monachis copiose tribuant et sine ulla retractione hilariter subministrent et nullius nimietatis inquietudine perturbent Ne a vita theorica vel immoderata superfluitas vel intolerabilis paupertas cum magno animi detrimento illos amoveat omnia in victu et vestitu secundum regulæ modificet præceptum Certe canonici omni victorum novo deturpati inani gloria tumidi invidiæ livore tabidi philargiriæ maculis obcecati luxuriæ facibus libidi gulæ omnimodo dediti regi terreno non episcopo subjecti præfati ruris usu veterano moderno tempore pascebantur alimentis Ebrietatem siquidem et homicidia sectantes conjuges suas turpiter nimia et inusitata libidine amplectentes ecclesiam Dei raro et perpauci frequentare volebant nec horas celebrare canonicas dignabantur Quo reatu ejectis cum præposito canonicis et eliminata immundorum spurcicia monachi in sede constituti sunt episcopali qui sanctis adornati virtutibus humilitate præcipui vigiliis hymnis et orationibus assidui abstinentia macti Castitate perspicui legitime viverent et obsequium ecclesie regulariter implerent Rura absque dubio superius notata renovare benivola studii intentione et quæ injuste abstracta fuerant Duntun videlicet Tantun Alresford Cleares Ticceburn Vvorðig Funteal Stoke Fermesham ecclesie Dei devotus ammodum ideo restitui ut tali et tam necessario jocundati additamento monachorum Christo humani generis redemptori fideliter casteque servientium gregem facilius libentiusque pascerent dum præfatis ruribus sublatis canonici turpiter contra fas inhonesteque degentes in tam angusti rerum possessione usu pascebantur perpetuo Alantur igitur solito monachi ab huius vitæ curis remoti unde alebantur canonici cum aviditate nimia curis vitæ recidivæ intenti Rura omnia superius notata episcoporum usui peculiariter ad votum deserviant Illa vero quæ canonici olim cum præposito sine peculiari præsulis dominio usu possederant veterano Hæc eadem monachi communiter ad necessarios usus jure possideant perpetuo et cum antistitis consilio ac juvamine bene regant et per præpositum fratribus cunctis necessarium episcopoque uti regula præcipit cum omni humilitate subjectum sapienter disponant Pastum ex monachorum villis nequaquam præsul dioecesim lustrando avidus exquirat Emptis necessariis fratrum indumentis quicquid ex lucro villarum superfuerit unito episcopi fratrumque consilio ob æternæ beatitudinis premium Christi erogetur pauperibus et non loculis episcopi peculiaribus ad animæ detrimentum reclusum custodiatur Post unius episcopi obitum alter ex eadem monachorum congregatione qui dignus sit pontificatus ordine fungi et non aliunde eligatur Si autem impedientibus peccatis vel imperitia in eodem monasterio talis qui dignus sit inveniri nequiverit ex alio noto monasterio monachus non autem canonicus ad tanti gradus dignitatem qui dignus sit secundum meritum atque doctrinam unanimi regis et monachorum ejusdem monasterii consilio sapienter eligatur Et non solum in hac pontificis electione verum etiam omnibus rebus regulæ usus jugi teneatur custodia ut in omnibus quæ egerint vel regulæ normam hilariter custodiant vel majorum cum omni devotione imitentur exempla Electus vero nulla superfluitate monachos perturbet vel inquietet nec clericos sive laicos in claustra vel refectorium introducat sed missam celebrans monachorum reverenter fungatur officio ac in refectorio quotiens voluerit comedens eorum et non canonicorum vel laicorum inibi utatur obsequio Monachos si quoslibet secum suum lustrando episcopium habere voluerit illos sumat qui provectæ ætatis sint quorum profectu et moribus ad Christi roboretur famulatum et non pueros vel juvenes lascivos quorum levitate Iesus in aliquibus depravetur Rura tam a regibus quam a diversis catholicis ad usus fratrum domino largiflue collata huius seculi militibus sive propinquis carnalibus pro munere quolibet adulando tribuens ad animæ suæ detrimentum nequaquam disperdat Qui prædicta statuta benivola servare voluntate studuerit domini nostri Jhesu Christi benedictione in præsenti seculo perfruatur et post ejus obitum ad æternæ beatitudinis vitam Christo opitulante securus perveniat Si quis autem philargyria seductus aliquid ex his quæ cum consilio sapientum præcepta sunt vel minuere præsumpserit deleatur nomen ejus de libro vitæ et in Jhesu Christo salvatoris mundi ejusque genitricis Mariæ omniumque sanctorum persecutione maneat et post vite sue terminum cum Juda Christi proditore ejusque complicibus inferni miseria punitus intereat si non cum satisfactione emendaverit quod nequiter pejerando deliquit