Charter Document - 06510132

Cum sacræ auctoritatis doctrina nos veridica sedulo ammoneat exhortatione ut non solum activæ visibilibus religiose conversando sanctisque proficiendo virtutibus charismatis dono perfusi decentissime perfruamur verum etiam contemplativæ invisibilia vitæ toto mentis conamine partim a recidivis semoti libentissime cum puro tranquilloque animi intuitu contemplando amplectemur dicens Cuncta quæ videntur temporalia sunt quæ autem non videntur æterna ego Eadgar Christi annuente clementi tocius Albionis basileus his recidivis practicæ vitæ possessiunculis æterna theoricæ emolumenta lucrando mercari desiderans quoddam rus a supradicta Wintoniensi ecclesia injusta quondam a philargiris abstractum rapina Aðelwoldo obtinente præsule ab illo qui injuste possederat justo arripiens judicio trinitati referendæ ejusque apostolis Petro et Paulo humillima reddens restituo devotione xl videlicet cassatos loco qui celebri Alresford nominatur vocabulo Nam rex religiosus Cynewalh nuncupatus a Birino pontifice fidei sacramentis imbutus idem rus in christianæ religionis exordio præfatæ Dei ecclesie magna animi largitus est devotione Hoc idem Ecgbirct regali fretus stemmate nova territorii consolidavit cartula Quidam aliquando prædictæ pontifex basilicæ a notis Denewulf nuncupatus cuidam propinquorum suorum Ælfred vocitato eatenus cum consensu ecclesiasticæ familiæ accommodavit ut annis singulis censum tocius telluris vita comite ritæ persolveret Is equidem insipiens adulterans stuprum propriam religiose lactatam abominans scor tam diligens libidinose commisit Quo reatu omni substantia peculiari recte privatus est et præfatum rus ab eo abstractum rex huius patriæ suæ ditioni avidus devenire injuste optavit Cujus aviditati præsul supra dictus minime consentiens datis centum viginti auri mancus is predictam tellurem ad usus præsulum satisfaciendo ecclesie Dei restituit Succedente itaque tempore supradicti adulterii et scelerati filius falso dicens esse sibi naturale suo injuste subiciens dominio ab ecclesia Dei præsumptuosus arripuit hereditariamque cartulam novis litterarum apicibus rege Eadredo cum animæ suæ consentiente periculo demoniis instinctu fascinatus edidit Quæ igitur cartula et omnes qui ei ausu consenserint temerario in domini maledictione permaneant et nullo umquam tempore ad aliquam utilitatem perveniat Vetus namque et hæc nova quam edidi cartula jugiter Christi omniumque judicio fidelium incolumis prævaleat adulterina quam prædixi cartula æterna dampnatione ad nichilum redacta et inperpetuum anathematizata Si quis igitur hanc nostram largifluam augere voluerit donationem augeat ejus dominus et vitam et prosperitatem hic et in futuro Qui autem lenocinante diabolo fastu superbiæ inflatus nostra violare vel minuere præsumpserit statuta in domini maledictione permaneat et a sanctæ Dei ecclesie consortio sanctorumque omnium contubernio privatus æterna misellus dampnetur miseria nisi resipiscens satisfaciendo restituerit quod in domini possessione violare præsumpsit